کۆلبەرەکی خەلکێ سەلاسی باواجانی ل سینۆرێ د ناڤبەرا رۆژھلات و باشوورێ کوردستانێ دە ب گولـلەیا راستەراستا ھێزێن ئیرانێ ھاتە کوشتن و 4 کۆلبەرێن دن ژی بریندار بوون.
رێخستنا مافێ مرۆڤان “ھەنگاو” ل رۆژھلاتێ کوردستانێ بەلاڤ کر، “ئیرۆ دانێ سبێ ھێزێن چەکدارێن ئیرانێ ل دەڤەرا ناوسوودێ یا پارێزگەھا کرماشانێ گولـلە بەردان کاروانەکێ کۆلبەران و د ئەنجامێ دە 5 کۆلبەر بریندار بوون.”
ھنگاوێ دیار کر ژی، “یەک ژ کۆلبەرێن بریندار یێ ب ناڤێ ئەیووب محەمەدی یێ ژ سەلاسی باوەجانی، پشتی کو ژ بۆ نەخوەشخانەیا قودسێ یا باژارێ پاوەیێ ھاتە راکرن، ژ بەر گرانیا برینێن خوە جانێ خوە ژدەست دا.”
ھەروھا گۆت، 4 گوندیێن دن یێن بریندار ژی ژ ئالیێ تیمێن تەندورستیێ یێن ھەمان نەخوەشخانەیێ ڤە ھاتن دەرمانکرن. لێ رەوشا وان یا تەندورستیێ نەھات ئەشکەرەکرن، ژ بەر کو ھەر چار بریندار ل بەشا لێنێرینا ھوور دە نە.
ھەژمارەک ژ خەلکێ رۆژھلاتێ کوردستانێ، ژ بۆ دابینکرنا دەبارا ژیانا خوە، ب رێیێن دژوار و چیایی، تێنە سەر سینۆرێن ھەرێما کوردستانێ و کارێ ڤەگوھەستنا کەلووپەلان دکن، لێ بەلێ سالانە ھەژمارەک ژ وان ب گولـلەیێن ھێزێن سوپایێ پاسدارێن ئیرانێ تێن کوشتن و بریندارکرن.
