دەما یەک ژ ئەندامێن کۆما چەتەیان “جوانێن شۆرەشگەر” یا سەر ب پەکەکێ ڤە ل باژارێ کۆبانێ هەول دایی کەچەکە 12 سالی برەڤینە و وێ د بەرژەوەندیا هەسەدێ دە چەکدار بکە، بابێ کەچکێ ب ڤێ یەکەێ دحەسە و ڤی ئەندامێ گرۆپا چەتە یا ب ناڤێ”جوانێن شۆرەشگەر” دقوتە و بریندار دکە.
چاڤکانیێن پێگەها دارکا مازی ئەشکەرە کرن، یەک ژ ئەندامێن گرۆپا چەتە یا ب ناڤێ “تەڤگەرا جوانێن شۆرەشگەر” یێ ب ناڤێ عادل سبحی براهیم کو خەلکێ گوندێ گابەلەک یێ سەر ب باژارۆکێ کۆبانیێ یە و ب کۆدناڤێ یەلماز کۆبانی تێ ناسکرن د 23/6/2024 دە ل گوندێ قنێ یێ سەر ب کۆبانێ خوەستیە کەچەکا بچووک یا 12 سالی یا ب ناڤێ ساکینا مەحموود حەمۆ برەڤینە، لێ د هەمان دەم دا بابێ کەچکێ “مەحموود” ب ڤێ یەکێ دحەسە و رووبروویێ عادل دبە و ژ بەر شەرێ د ناڤبەرا وان دە دقەومە عادل بریندار دبە و مەحموود ژی کەچا خوە رزگار دکە.
چاڤکانیێن دارکا مازی هەر وەها ئەشکەرە کرن، پشترە هێزەکە ئاساییشا تایبەت HAT یا سەر ب پەیەدێ ڤە ب سەر گوندی دە گرتیە و بابێ کەچکێ ب تاوانا شەرکرن و لێدانا عادل سبحی دەستەسەر کریە و هەیا نها د زندانێ دە یە و نەهاتیە ئازادکرن.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان ب داوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
