سەرێ سبەها ئیرۆ خەلکێ گوندێ گوهەرزێ یێ دەڤەرا نهێلێ یا سەر ب ئامێدیێ ڤە، ژ بەر شەرێ سەختە یێ د ناڤبەرا ئارتێشا ترک و چەکدارێن پەکەکێ ل وێ دەڤەرێ پێک تێ خوەپێشاندانەکە گرسەیی ئەنجام دا، د خوەپێشاندانێ دە داخواز ژ هەر دو ئالیان هات کرن ڤی شەرێ سەختە ل دەڤەرا وان دوور بکن، لێ بەلێ چاپەمەنیا پەکەکێ ئەڤ یەک وەک سەرهەلدانا عەشیرێن دەڤەرا ئامێدیێ ل دژی لەشکەرێ ترکیێ بناڤ کر.
ژ بەر کو ئیرۆ ژی خەلکێ گوندێ گوهەرزێ یێ دەڤەرا ئامێدیێ راستی خەتەریەکە مەزن هاتن و تۆپەکە دن د ناڤا گوندێ وان کەت، هەژمارەک ژ خەلکێ گوند ژ بۆی بالکشاندنە سەر ڤێ خەتەریێ رێیا د ناڤبەرا ئامێدیێ بۆ دێرالۆکێ گرتن، گوندیان داخواز کر کو جان و مالێ وان وەرە پاراستن و ئێدی باجا ڤی شەرێ سەختە نەدن و ئەڤ شەرێ سەختە ژ گوند و دەڤەرا وان بێ دوورکرن.
رۆژ نیوسا پەکەکێ کو ل باژارێ سلێمانێێ وەشانێ دکە، ئەڤ نووچە ژی وەکە تەڤ نووچەیێن دن سەختە کر و نڤیساند، “ئێرشێن دەولەتا ترک بێ ناڤبەر دەوام دکن، ل گۆری ئاگاھیان ژ عەشیرێن رێکانی، نێوەیی، نھێلی، ئامێدی، زێباریێن خەلکێ گوندێن گوھەرزێ، بەلاڤا، بەرچێ، کانێ و ئاشکایێن ئامێدیێ و شێلادزێ یێن سەر ب دھۆکێ، دژی داگرکەریێ رابوونە سەر خوە.” ب ڤێ دەرەوێ پەکەکە دخوازە ئالیگرێن خوە بخاپینە و ووسا نیشان بدە عەشیرێن دەڤەرێ ب تەنێ ل دژی دەولەتا ترکیێ نە و خەلکێ دەڤەرێ ت پرسگرێک لگەل هەبوونا پەکەکێ ل باشوورێ کوردستانێ نینە، لێ بەلێ یا راست تەڤی کو ئیرۆ ب تەنێ خەلکێ گوندێ گوهەرزێ بوون کو رێیا د ناڤبەرا ئامێدیێ بۆ دێرالۆکێ دە گرتی، لێ بەلێ خەلک ب گشتی ل دژی هەبوونا لەشکەرێ ترکیێ و چەکدارێن پەکەکێ یە ل باشوورێ کوردستانێ و دخوازن ئەڤ شەرێ سەختە ژ دەڤەرا وان بێ دورکرن.
گەر سەری راکرنەک ل بەهدینانێ روودابە ژی، ئەڤ سەری راکرن ل دژی هەردو ئالیان “پەکەکێ و دەولەتا ترک” بوویە و خەلک دخوازن ئەڤ شەرێ ساختە بێ راوەستاندن، خەلکێ دەڤەرا ئامێدیێ دبێژە، “بلا پەکەکە و ترکیە شەرێ خوە ببن سەر ئاخا خوە و مە نەکن بەشەک ژ ڤی شەرێ سەختە.” هەر وەها هەم ژ پەکەکێ و هەم ژ ترکیەیێ دخوازن ڤی شەرێ سەختە یێ کو دبە سەدەما خەتەریەکە جدی ل سەر مال و جانێ وان راوەستینن.
