د 3 رۆژێن رابووری دا ب سه‌ده‌ما لڤ و ته‌ڤگه‌رێن په‌كه‌كێ یێن ل دەردۆرا گوندێن پارێزگه‌ها دهۆكێ، ئارتێشا تركیێ ب ده‌هان بۆمبه ل گوند و ده‌ڤه‌رێن دیار یێن دهۆكێ باراندنه، ته‌ڤی شه‌واتا ب ئاقارێ وان گوندان كه‌تی زراره‌ك مه‌زن ب ده‌ڤه‌رێن چاندنیێ ژی كه‌تیه، په‌كه‌كێ ب مەبەست شه‌رێ خوه یێ بێ ئه‌نجام ڤه‌گوهه‌ستیه دەردۆرا گوندێن دهۆكێ، ئه‌و دخوازه گوند وه‌رن چۆل كرن و ببن قادێن شه‌ر.
ل گۆری ئامارا 3 رۆژێن رابووری یا لڤ و ته‌ڤگه‌رێن په‌كه‌كێ و ئێریشێن تركیێ، ل رۆژێن 8، 9 و 10ێ تیرمه‌ها ئیسال 2024ێ ئارتێشا ترکیێ ب ئێریشێن ئاسمانی و به‌ژاهی هەژمارەک ژ گوندێن سەر ب پارێزگەها دهۆکێ ڤە بۆمبەباران کرنە و ب ڤێ سەدەمێ زرارەک مەزن ب رەز و باخ و خوه‌زایا دەڤەرێ گهشتیە.
ئێریشێن ترکیەیێ یێن ب سەدەما هەبوونا چەکدارێن پەکەکێ د ناڤا ئاخا هەرێما کوردستانێ دە ب تایبەتی ل دەڤەرا ئامیدیێ ب ڤی ئاوا بوون:
8/7/2024:
ل دەمژمێر 1:00 هەیانی 6:25ێ ئێڤارێ چەکدارێن پەکەکێ ل ئاقارێ گوندێ مژێ یێ دەڤەرا بەرێ گارێ ب تۆپان ل لەشکەرێ ترک یێ ل گوندێ سەرگەلێ یێ سەر ب دەڤەرا نهێلیان خستیە، لەشکەرێ ترکیێ ژی د بەرسڤ دە ئاقارێ گەندێ مژێ تۆپباران کریە و ب ڤێ سەدەمێ زرارەک مەزن گهشتیە گوندیان.
ل دەمژمێر 7:18 ئێڤارێ بالافرێن لەشکەرێ ترکیەیێ تونەلا هنداڤی گوندێ گوهەرزێ یێ دەڤەرا نهێلیان بۆمبەباران کریە.
9/7/2024:
ل دەمژمێر 6:44 هەیانی 6:57 ئێڤارێ بالافرێن دەولەتا ترکیەیێ گوندێ مژێ، سپیندارێ و سەرێ زەنگلێ ل چیایێ بێسمتێ یێ دەڤەرا بەرێ گارێ بۆمبەباران کریە.
ل دەمژمێر 7:7 ئێڤارێ بالافرێن دەولەتا ترکیەیێ جارەکە دن تونەلا دکەڤە هنداڤی گوندێ گوهەرزێ، دەریێ بێرا و سەرێ چیایێ کورکوبناڤی یێن سەر ب دەڤەرا نهێلێ ڤە بۆمبەباران کرنە.
ل دەمژمێر 9:30 هەیانی 9:50 شەڤێ هەلیکۆپتەرێن دەولەتا ترکیەیێ ب چەکێ دۆشکە تەقە ل گەلیێ بازێ یێ دەڤەرا بەرواری بالا کریە.
ل دەمژمێر12:00 هەیانی 12:30 نیڤرۆژێ تۆپخانەیێن لەشکەرێ ترکیەیێ ئاقارێ گوندێ مژێ یێ دەڤەرا بەرێ گارێ ل ناحیا دێرالۆکێ ب زێدەتری 15 تۆپان تۆپباران کریە.
ل دەمژمێر 92:45 هەیانی 3:30 نیڤرۆژێ تۆپخانەیێن لەشکەرێ ترکیەیێ ئاقارێ گوندێ مژێ و کڤەنە مژێ یێن سەر ب ناحیا دێرالۆکێ ب زێدەتری 10 تۆپان تۆپباران کرنە.
10/7/2024:
ل دەمژمێر 12:20 نیڤرۆژێ تۆپەک ل نێزی مالا شێنیەکێ گوندێ گوهەرزێ یێ دەڤەرا نهێلێ کو سەر ب ناحیا دێرالۆکێ ڤە یە کەتیە.
