تۆرەکا چاڤدێریا مافێن مرۆڤان راگھاند، ژ دەستپێکا تیرمەھێ ڤە 11 زارۆک ژ ئالیێ جوانێن شۆرەشگەر ڤە ھاتنە رەڤاندن و ژ بۆ کامپێن لەشکەریا نەچار ھاتنە برن.
تۆرا رەسەدا سووری یا مافێن مرۆڤان د راپۆرەکێ دە دیار کر، رەڤاندن و لەشکەرکرنا زارۆکان ژ ئالیێ تەڤەگرا جوانێن شۆرەشگەر یا سەر ب ھێزێن سووریەیا دەمۆکراتیک ڤە زێدە بوویە.
وێ ژێدەرێ گۆت: “تەڤی ھەولدانێن مالباتێن زارۆکێن رەڤاندی ژ بۆ ڤەگەراندنا زارۆکێن خوە کو ل پێش ناڤەندێن ئەولەکاریێ یێن ھەسەدێ ل قامشلۆ کۆم بووبوون، لێ ئەڤ ھەولدانێن وان ب سەر نەکەتن.”
دیار کر ژی، “ھێزێن ئەولەھیێ یێن سەر ب ھەسەدێ ڤە گەف ل مالباتان خوارن ژی کو ژ بۆ پاراستنا ژیانا خوە و زارۆکێن خوەیێن رەڤاندی، نابە ئەو لگەل دەزگەھێن راگھاندنێ پەیوەندیێ بکن.”
تۆرا رەسەد پشتراست دکە کو دیاردەیا رەڤاندنا زارۆکان د دەما داوی دە ب ئاوایەکی بەرچاڤ زێدە بوویە و وان ژ دەستپێکا خزیرانا بۆری ڤە، رەڤاندن و لەشکەرکرنا 21 زارۆکان بەلگە کرنە.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
