نڤێسینگەها راگەھاندنێ یا پارتیا وەلاتپارێزێن کوردستانێ (PWK) ب پەیامەکێ در. عەبدولرەحمان قاسملۆ ببیر ئانی و تێ دە راگھاند، “ئەو ئالایا کو پێشەوا قازی محەمەد ل مەیدانا چارچرایێ ھلدابوو، ئیرۆ ل ھەر چار پەرچەیێن کوردستانێ ژی، د دەستێن پێشمەرگە و تێکۆشەر و کەدکارێن قەھرەمان دە، ژ بۆ ئازادییا کوردستانێ ل با دبە.”
پەیاما نڤێسینگەها راگەھاندنێ یا PWK:
سەکرەتەرێ گشتییێ پەدەکە-ی (پارتییا دەمۆکراتا کوردستانا ئیرانێ) در. عەبدولرەحمان قاسملۆ د 13 تیرمەھا 1989 دە ل ڤیەنەیا پایتەختێ نەمسایێ ل گەل بەرپرسیارێ دەرڤەیی وەلات یێ پەدەکە-ی عەبدوللا قادریزادە و در. فازل رەسوولێ ژ باشوورێ کوردستانێ، ژ ئالییێ ئیستیخباراتا ئیرانێ ڤە د ئۆتەلێ دە ھاتن قەتلکرن.
در. عەبدولرەحمان قاسملۆ و ھەڤالێن خوە گاڤا جڤینا گۆفتووگۆیان یا ب دیپلۆماتێن دەولەتا ئیرانێ رە لداردخستن، ژ ئالییێ سیخورێن دەولەتا ئیرانێ ڤە تووشی ڤێ کۆمپلۆیێ بوون.
مخابن، دەولەتا نەمسایێ، د دەربارێ قەساس و پلانگەرێن ڤێ قەتلیعامێ دە تو دۆز ڤەنەکرییە.
در. عەبدولرەحمان قاسملۆ، سییاسەتمەدار، رەوشەنبیر و دیپلۆماتەکی وەلاتپەروەر بوو.
در. عەبدولرەحمان قاسملۆ ھەروەھا پێشمەرگە، فەرماندار و رێبەرەکی ب تەجروبە و ھێژا بوو کو، نە بەس ژ کیسێ پەدەک-ی، لێ بەلێ ژ کیسێ ھەموو کورد و کوردستانییێن جیھانێ چوو.
دەولەتا ئیرانێ بەرییا قەتل کرنا قازی محەمەد، در. عەبدولرەحمان قاسملۆ و در.سادق شەرەفکەندی ژی، پشتی وان ژی گەلەک جاران ب رێیێن کۆمپلۆ و کوشتنان خوەستییە تێکۆشینا ئازادییا گەلێ مەیا ل رۆژھلاتێ کوردستانێ بفەتسینە. لێ بەلێ چ کۆمپلۆ و قەتلیعامان نکاری رێ ل بەر تێکۆشینا ئازادییا گەلێ مە بگرە.
ئەو ئالایا کو پێشەوا قازی محەمەد ل مەیدانا چارچرایێ ھلدابوو، ئیرۆ ل ھەر چار پەرچەیێن کوردستانێ ژی، د دەستێن پێشمەرگە و تێکۆشەر و کەدکارێن قەھرەمان دە، ژ بۆ ئازادییا کوردستانێ ل با دبە.
در. عەبدولرەحمان قاسملۆ و ھەموو شەھیدێن کوردستانێ، د تێکۆشینا ھەموو شەرڤانێن قەھرەمان و کەدکارێن دۆزا ئازادییێ دە دژین.
د 35 سالڤەگەرا شەھادەتا وان دە ئەم در. عەبدولرەحمان قاسملۆ و ھەڤالێن وی ب گرامی ببیر تینن و ب ڤێ مناسەبەتێ جارەکە دن ژی ئەم دەولەتا ئیرانێ روورەش دکن.
