ل دیاربەکرێ سازیێن سڤیل ب داخویانیەکا ھەڤپار ئێریشا ل ناڤ سوورێ ل دژی کارگەھان ھاتین کرن شەرمەزار کرن و بال ھاتە کێشان کو ئەڤە دەمەکە ئێریشێن ڤی رەنگی روو ددن کو دڤێت پێشی لێ بهێت گرتن. سازیێن سڤیل بانگ ل رایا گشتی کرن کو بێھتر سەردانا سوورێ بکن و بێھتر ل سوورێ خوەدی دەربکەڤن.
ژ ئالیێ پلاتفۆرما پشتگری و پاراستنێ یا باژێر ڤە ل دیاربەکرێ ل دژی ئێریشا 11 تیرمەھێ ل سوورێ ل سەر 2 گارگەهان و ئۆتەلەکێ روو دابوو داخویانیەک ھەڤپار بۆ چاپەمەنیێ ھات دایین. داخویانی ژ ئالیێ بەردەڤکا پلاتفۆرمێ یلدز ئۆک ئۆراک ڤە ل کۆلانا کو ئێریش لێ پێک ھاتبوو ھات خوەندن. د داخویانیێ دە ھات گۆتن کو نایێ قەبولکرن دەستوەردان ل شێوازا لباسێن ژنان دە بهێت کرن و بال ھاتە کێشان کو مافێ ت ئالیەکێ نینە کو زرارێ بدە چاندا پێکڤەژیانێ یا دیاربەکرێ. داخویانیێ دە ھات گۆتن کو د دەمێن داوین دە ئێریشێن وسا زێدە بوونە و دڤێت سەردۆزگەریا کۆماری یا دیاربەکر لێپرسینەک بباندۆر و جددی بمەشینە.
سەرۆکێ کۆمەلەیا مافێن مرۆڤان یا شاخا دیاربەکرێ ئەرجان یلماز گۆت: “د ناڤا مەھەکێ دە ئەڤ جارا 5ێ یە کو ئێریشێن وسا یێن ل سەر شێوازا ژیانا مرۆڤان تێن کرن روو ددن. ئێریشی دانسا مرۆڤان دکن، ئێریشی خوارنگەھان دکن، ئێریشی ژنێن دکەڤن ئاڤێ دکن، ئێریشی گارگەهان و ئۆتەلان دکن. دڤێت لێکۆلین بهێت کرن کو ناڤبەرا ڤان ئێریشان دە تێکلی ھەنە یان نە. ژ بەر کو رەنگێ ئێریشان دشبهن ھەڤ، کەسێن ئێریشکار دشبهن ھەڤ. ئێریشێن ئاژاوەگێرینە، ئەگەر کەسێن راستی ئێریشان تێن بەرسڤا ئێریشان بدن دێ رەوش بچە خالەک گەلەک مەترسیدار.”
کەسێن راستی ئێریشێ ھاتین ژی دبێژن ئەو دەست ژ کارێ خوە بەرنادن، ئەو دێ ھەر دەم ل چاندا خوە خوەدی دەربکەڤن. خوەدیێ کارگەھا راستی ئێریشێ ھاتی دبێژە ناڤێ کارگەھا وی حەوشە و ئەو حەوشیا ھەمو خەلکێیە کو ئەو رێ نادن ترس ل ناڤا سورێ بەلاڤ ببە.
خوەدیێ گارگەها راستی ئێریشێ ھاتی باھۆز داملایج گۆت: “ئەم ژ ئێریشێن وان ناترسن، پشتی ئێریشێ ئەم ھاتن ڤێ دەرێ مە دیسا کارگەھا خوە ڤەکر، ئەم دێ خوەدی ل چاندا خوە دەرکەڤن، ئەم دێ خوەدی ل حەوشا خوە دەربکەڤن، ئەم دێ خوەدی ل زمانێ خوە دەربکەڤن.”
ئەندامێن سازیێن ھەڤگرتیێن پلاتفۆرمێ نە بریار دانە کو ئەو دێ ژ ئیرۆ پێ دە بێھتر سەردانا گارگەهێن ناڤ سوورێ بکن و بێھتر ل کارگەهێن ناڤ سوورێ وەختێ خوە دەرباس بکن.
