سەرۆکوەزیرێ هەرێما کوردستانێ مەسروور بارزانی هەولا تەرۆرکرنا بەرپرسێ لقێ 22ێ پارتیا دەمۆکراتا کوردستانێ (په‌ده‌كێ) ل گەرمیانێ ئەکرەم سالح شەرمەزار دکە و رادگهینە، «دڤێ دەزگەهێن پێوەندیدار هەول بدن کو بەرپرسێن ڤی کارێ تەرۆریستی ئەشکەرە بکن».
سەرۆکوەزیر مەسروور بارزانی ئیرۆ 16ێ تیرمەهێ د داخویانیەکێ دە گۆت: «ئەز هەولا تەرۆرکرنا برێز ئەکرەم سالح، بەرپرسێ لقێ 22ێ پارتیا دەمۆکراتا کوردستانێ (په‌ده‌كێ) ل گەرمیانێ شەرمەزار دکم و دڤێ دەزگەهێن پێوەندیدار هەول بدن کو بەرپرسێن ڤی کارێ تەرۆریستی ئەشکەرە بکن».
سەرۆکوەزیر مەسروور بارزانی تەکەز کر ژی: «هەر کەس و ئالیێ ل پشت ڤێ هەولا ترسۆنەک بە، بەرپرسیاریا ئەنجامێن وێ هلدگرە سەر ملێ خوە و دێ رووبروویی یاسایێ ببە».
ئۆتۆمۆبیلا بەرپرسێ لقێ 22ێ په‌ده‌كێ ئەکرەم سالح دوهی دانێ سبێ ل بەر دەریێ مالا وی ل باژارۆکێ کەلارێ هاتبوو تەقاندن.
ئەکرەم سالح د کۆنگرەیەکە رۆژنامەڤانی دە ژی راگهاند، تەقینا ل بەر دەریێ مالا وی، کارەکی تەرۆریستییە و ئۆتۆمۆبیل ب رێیا بۆمەبەیەکە ڤەدایی هاتیە تەقاندن.
هەروها دا زانین، د ئەنجاما وێ تەقینێ دە، ئەو شۆفێرێ وی و پێشمەرگەیەک ب سڤکی بریندار بوونە و ئۆتۆمۆبیلا وی ب تەمامی شەوتیە.
بەرپرسێ لقێ 22ێ په‌ده‌كێ ل گەرمیانێ داخواز ژ دەزگەهێن ئەولەهیێ کربوو کو لێکۆلینێ ل سەر بوویەرێ بکن و ئەو ل بەندا ئەنجامێن لێکۆلینێنە.
