هەبوونا چەکدارێن په‌كه‌كێ ل هەرێما کوردستانێ بوویە مەترسی ل سەر ژیانا وەلاتیێن گوندان، بێ جوداهیا ناڤچە و پێکهاتەیێن ئۆلی و نەتەوەیی.
ل پارێزگەها دهۆکێ گەلەک گوندێن كرستیانان ژ بەر هەبوونا چەکدارێن په‌كه‌كێ و ئێرشێن فرۆکەیێن شەرێن ترکیەیێ ڤالا بوونە. ب تایبەت پشتی ئێرشا ئارتێشا ترکیەیێ ل سەر بارەگەهـ و شانەیێن په‌كه‌كێ، گوندی هین بێهتر کۆچبەر و پەریشان بوونە.
گوندێ دۆرێ یێ سەر ب باژارۆکێ کانی ماسێ ڤەیە و روونشتڤانێن وی كرستیانن، بەشەکە مەزن ژ خەلکێ وی ژ بەر شەرێ د ناڤبەرا ئارتێشا ترکیەیێ و په‌كه‌كێ دە دەرکەتنە و چوونە دەڤەرێن دنێن نێزیکی دهۆکێ.
وەلاتیێ كرستیان زیا ئیشا گۆت: «ئەڤ 34 سالن ئەز ل ڤر دژیم و نکارن ژ گوند دوور بکەڤن. ژ بەر کو نها شەرێ د ناڤبەرا په‌كه‌كێ و لەشکەرێن ترک دە نێزی گوند دبە، ژ بۆ مە بوونە مەترسی و ئەم کۆچبەر بوونە».
وەلاتیەکی دنێ كرستیان دبێژە: «سالەک و شەش مەهن ئەم ژ گوند دەرکەتنە و ئەم نکارن ڤەگەرن. ژ بەر شەرێ د ناڤبەرا په‌كه‌كێ و ئارتێشا ترکیەیێ دە، مە 5 گوندێن نێزی هەڤ، ب مال و ملکێ خوە ل پشت خوە هشتن و ئەم نزانن چ وێرانی ب سەر دە هاتنە».
ژ گوندێن كرستیانێن گرێ، ملەختا، سەردەشت، هەلاوا و خۆرێژ یێن سەر ب باژارۆکێ کانی ماسی ڤە، د ڤان سالێن داوی دە 250 مالباتان ژ بەر هەبوونا په‌كه‌كێ ژ مالێن خوە دەرکەتنە.
گوندی ژ بەر تەرکاندنا زەڤی و باخچەیێن خوە، زیانێن مادییێن مەزن دیتنە. هن گوندێن دن یێن ل ڤێ دەڤەرێ تەڤی هەموو خەتەری و پرسگرێکێن ئەولەکاریێ ژی، لێ هین ژی گوندێن خوە دەرنەکەتنە.
وەلاتیێ كرستیان گۆرگیس ئادەم دبێژە: «رەوش ئالۆزە و گەلەک زیان گهشتیە وەلاتیان. ئەڤ یەک بوویە سەدەم کو وەلاتی جارەکە دن بەرێ خوە بدن باژاران. جۆتکار و باخچەڤان زرارەکە مەزن دیتنە و زەڤی و باخچەیێن وان شەوتینە».
ل گۆری ئاماران، ژ بەر شەر و پەڤچوونێن د ناڤبەرا ئارتێشا ترکیەیێ و چەکدارێن په‌كه‌كێ دە، ل باژارۆکێ ئامێدیێ یێ ب پارێزگەها دهۆکێ، نێزیکی 300 مالباتێن گوندان، ژ مالێن خوە دەرکەتن و کۆچبەری ناڤچەیێن ئارامێن پارێزگەها دهۆکێ بوونە. د ناڤ وان دە ژی، زێدەتری 180 مالباتێن كرستیان هەنە.
ترس هەیە کو ژ بەر درێژبوونا و بەرفرەهبوونا شەر و پەڤچوونێن د ناڤبەرا په‌كه‌كێ و ئارتێشا ترکیەیێ دە، جارەک دن مینا ئەنفالا بادینانا سالێن 1980ێ، پرانیا گوندان ڤالا ببن.
چاڤکانی: کوردستان 24
