رۆژنامەیەکا عەرەبی ئاشکەرا دکە کو چەکدارێن پەکەکێ ب دەھان کیلۆمەترەیان ژ ناڤچەیێن د بن دەستھلاتا خوە دە ژ بۆی ئارتێشا ترکیێ ھشتینە، لێ ھەژمارەک ھەموەلاتیێن سڤیلێن پارێزگەھا دوھۆکێ گرتنە و وان تۆمەتبار دکن.
ل گۆر راپۆرتەکا رۆژنامەیا ئەلعەرەبی ئەلجەدید کو دەربارێ شەرێ ترکیێ و پەکەکێ دە ل ناڤچەیێن سینۆری یێن ھەرێما کوردستانێ دە ھاتیە بەلاڤکرن، د شەری دە ب دەھان چەکدارێن پەکەکێ ھاتنە کوشتن و بریندار کرن و دەرڤەیی وێ ژی ترکیێ ھەموو ئۆتۆمۆبیل و بارھەلگران دکە ئارمانج کو گومان دکە چەک و پێویستیێن لۆژیستیکی یێن پەکەکێ ب وان ئۆتۆمۆبیلان تێن ڤەگوھەستن.
رۆژنامەیێ ب زمانێ فەرماندارەکی پێشمەرگە ئاشکەرا کر، پەکەکێ ب کووراهییا 20 کیلۆمەترەیان ل ھەمبەر ئارتێشا ترکیەیێ خوە پاشڤەکێشایە و پرانیا ناڤچەیێن چیایێ گارە و لووتکەیا چیایێ مەتینا ژ دەست دانە.
ل گۆر ھەمان رۆژنامەیێ د ئۆپەراسیۆنێ دە ترکیا ب یەکجاری پەکەکێ ژ سینۆرێن خوە دوور دخە و ئێدی د پاشەرۆژێ دە جیھا کو پەکەکە پرسگرێکا ترکیێ بە، دبە پرسگرێکا ئیراقێ.
د بەشەکادن یا وێ راپۆرتێ دە، پشتی بەحسا پاشڤەکێشان و رەڤینا پەکەکێ یا ل ھەمبەر ئارتێشا ترکیێ تێ کرن، بەحس تێ کرن کو پەکەکێ ھەژمارەک ھەموەلاتیێن سڤیل یێن سینۆرێ پارێزگەھا دوھۆکێ ژی گرتنە و وان تۆمەتبار دکە کو سیخوریێ ژ بۆ ترکیێ دکن. نھا ژی مالباتێن وان ژ بۆ ئازادکرنا ئەولادێن خوە لگەل پەکەکێ د پەیوەندیێ دە نە.
ئەڤ یەک د دەمەکی دەیە کو ب دەھان سالە پەکەکێ دەست دانیە سەر ناڤچەیێن سینۆری یێن ھەرێما کوردستانێ، سەدان ھەموەلاتیێن ھەرێما کوردستانێ ژی ژ بەر کو ئامادە نەبوونە باجێ بدن پەکەکێ، یان ژی مولک و مالێن خوە بخن بن خزمەتا پەکەکێ، تۆمەتا سیخوریێ ژ بۆ وان ھاتیە ڤەهاندن و پشترە ژی ل ھەمبەر پارەیەکی زێدە ھاتنە ئازادکرن و ئەگەر پارە ژی نەدابن، ژ ئالیێ پەکەکێ ڤە ھاتنە کوشتن.
