حه‌فت چه‌كدارێن رێخستنا په‌كه‌كێ د 24 ساعه‌تێن ده‌رباسبوویی ده ل ده‌ڤه‌را خاكوركێ یا ل باشوورێ كوردستانێ و هه‌ر وها ل رۆژئاڤا كوردستانێ، كه‌تنه به‌ر ئێریشێن ئاسمانی و هاتنه كوشتن.
وه‌زاره‌تا پاراستنا نه‌ته‌وی یا تركیێ راگهاند، دوهـ رۆژا سێشه‌می 16/7/2024ێ 3 چه‌كدارێن پارتیا كاركه‌ران ل هه‌رێما خاكوركێ یا ل باشوورێ كوردستانێ كه‌تن به‌ر ئێریشێن ده‌وله‌تا ترك و هاتن كوشتن، ل هه‌مان رۆژێ 4 چه‌كدارێن یه‌په‌گێ/په‌كه‌كێ ل هه‌رێما مه‌رتالا فه‌راتێ بوونه هه‌ده‌ف.
ل گۆری ئامارێن 4 رۆژێن رابووری، ئانگو رۆژێن 12، 13 و 14 و 15 تیرمه‌هێ 29 چه‌كدارێن په‌كه‌كێ، ل چیایێن گاره و خاكوركێ یێن ل باشوورێ كوردستانێ هاتنه كوشتن.
ئارتێشا تركیێ پێتری مه‌هه‌كێ یه ئێریشه‌كه دژوار ل دژی رێخستنا په‌كه‌كێ ل باشوورێ كوردستانێ دا یه ده‌ستپێكرن، رۆژانه گوندێن سینۆرێ پارێزگه‌ها دهۆكێ ب سه‌ده‌ما لڤ و ته‌ڤگه‌رێن په‌كه‌كێ دكه‌ڤن به‌ر ئێریشان و رووبه‌رێن هه‌ری به‌رفه‌ره‌هـ یێن ئاقارێن گوندێن دهۆكێ شه‌وتینه و زراره‌كه مه‌زن چێبوویه.
