گرۆپێن چەکدارێن سەر ب ئارتێشا ترکیەیێ ڤە، نێزیکی 90 داران ل چەند گوندێن عەفرینێ بڕین و دەست دانین سەر 6 یەکەیێن نشتجھبوونێ و فرۆتن.
رەوانگەھا سووری بۆ مافێن مرۆڤان بەلاڤ کر، چەکدارێن گرۆپا “فەیلەق ئەل-شامێ” 15 دارێن ھناران یێن جۆتکارەکی د ناڤبەرا گوندێن ئیساق و شادێرێ دە بڕین و وەک ئێزنگ فرۆتن.
ھەمان ژێدەرێ دا زانین ژی، چەکدارێن سەر ب گرۆپا ب ناڤێ “ئارتێشا نشتمانی” ڤە 24 دارێن زەیتوونان ل گوندێ عەین دارا بڕین و برن ئدلبێ، تا کو وەک ئێزنگ بفرۆشن.
دیار کر ژی، ل گوندێ مەتینا 35 دارێن زەیتوونان و ل گوندێ دێرویش ژی 12 دارێن زەیتوونان و 5 دارێن گووزان ژ ئالیێ چەکدارێن سەر ب گرۆپا ب ناڤێ “ئارتێشا نشتمانی” ڤە بڕین.
رەوانگەھێ بەلاڤ کر، چەکدارێن سەر ب گرۆپا سولتان سلێمان شاھ (ئەمشات) دەست دانین سەر 6 یەکەیێن نشتەجھبوونێ یێن ب دوماهی نەهاتی ل سەر رێیا جندرس – ئەفرینێ یێن وەلاتیەکی کورد و ئەو ھەر یەک ب 800 دۆلاران فرۆتن چەکدارێن دن.
ژ دەما داگیرکرنا عەفرینێ د 18 ئادارا 2018 دە ژ ئالیێ ئارتێشا ترکیەیێ و گرۆپێن چەکدار ڤە، ژ بلی دەستدانینا سەر مال و ملکێن خەلکێ، ب سەدان ھەزار دارێن بەرھەمدار و دارێن دارستانان ھاتنە هەلکێشان، بڕین و شەوتاندن.
