بووبێ ئەسەر
ھوون یا راستی بخوازن، ھەگەر نە ژ عەشیرەتا ئانکو کۆنفەدەراسیۆنا بارزانیان و ب تایبەتێ نە ژ بارزانییان با، نھا زوو دە دۆزا کورد و کوردستانێ، ل سەر دەستێ خوەفرۆش و خاینێن کوردان دە تێک چووبایە. ئەڤ زێدەتری سەد سالانە کو ژ بۆنا دۆزا گەلێ کورد تێک نەچە، بارزانیان شەرێ ئازادیا گەلێ خوە کرنە و دکن. د ناڤا شەر و پەڤچوونێ دە کورد کرن خوەدێ رێبازەکێ کو ئەو خوە ل گۆر وێ ب رێخستنی بکن.
دەما بارزانیان کارێ، رێخستنیا خوە یا ل سەر ئەساسێ رێبازا پیرۆز نووژەن کرن. دەست ب شەری ھەبوون و نەمانا کورد و کوردستانێ کرن. ھێ ژی ژ بۆنا سەرخوەبوونا کوردستانێ تەکۆشینا گەلێ خوە ددن. ژ بۆنا ڤێ ئارمانجێ، خوە فەدا دکرن، دا کو کوردستان بگەهە ئارمانجا خوە ئانگۆ کوردستانەکا سەربخوە دیاری گەلێ خوە بکن.
دڤێت ئەم ھەر قەھرەمانەکی گەلێ خوە، د دلێ خوە دە ب جھ بکن. چ یێن مری و چ یێن زیندی، پێویستە ئەم خوەدی ل وان دەرکەڤن. وان بپارێزن. ژ بەر کو قەھرەمان، رێبەر زوو ب زوو دەرناکەڤن، پەیدا نابن. لەورا دڤێت ئەم یێن بوونە جانگۆری تم ب بیر بینن و خوەدی ل یێن ھێژ د ناڤا مە دە نە و ژ بۆنا گەلێ خوە دژین، دەرکەڤن.
باوەر بکن ھەتا نھا کێ سەرکێشیا گەلێ مە کرنە، چ رێبەر و مەزنێن مە ھەبوون و ھەنە دڤێت ئەم تم وان زیندی بکن. خوەدی ل کەد و قەھرەمانیا وان دەرکەڤن. رێ و رێبازێن وان، روھێ تەکۆشینا وان، ژ خوە رە بکن رەھبەر. د رێیا ژ بۆنا ئازادیا گەلێ خوە دە گەلەک وێرەک و مێرخاسان ژ بۆنا دۆزا گەلێ وان تێک نەچە، خوە فەدا کرنە. دڤێت ئەم وان ژ بیر نەکن. لێ د ناڤا ھەمی قەھرەمانێن وەلاتێ مە دە جھێ بارزانیان تایبەتمەندیەکە خوە ھەیە. ئەو تەنێ نە تەکۆشەر بوون. ھەر وەھا ئەو د وێ زانابوونا دانانا رێبازەکێ دە ژی بوون. ئیرۆ ئەم ب سایا وێ رێبازێ خوەدی پارچەیەک ئاخا خوە یا ئازادن.
لێ دڤێت ئەم ژ بیر نەکن کو مەلا مستافا بارزانیێ نەمر، سەرۆک و قەھرەمانەکی وەلاتێ خوە، رێبەرەکی گەلێ خوە بوو. لەورا ژی ھندەک تایبەتمەندیێن وی ژ رێبەر و قەھرەمانێن مە یێن دن جوودا بوو. کەسی ب قاسی وی دژمنێ خوە ناس نەکربوون. لەورا ل گۆر ڤێ ناسینێ وی رێباز نووژەن کر و د ژیانێ دە پێک ئانییە.
دڤێت کورد ژی ڤێ رێبازێ فێر ببن دا کو بدن سەر شۆپا بارزانی. شۆپا وی نەتەوەیی یە، شۆپا وی وەکھەڤییە. شۆپا وی رێبازا کوردانە. رێبازا وی کورد و کوردستانییە. چ دەما و ل کیژان پارچا کوردستانێ کورد ل گۆر ڤێ تەڤبگەرن، دێ ب کاربن وەلاتێ خوە ئانکو پارچێن دن ژی ژ بن دەستێ داگیرکەران ئازاد بکن.
پێویستە ئەم باش بزانبن و فێر ببن کو ھەگەر نە ب گولەیا ئەول یا بێدەنگیا کوردان راکربوو، ھەگەر نە ژ وێ شۆرەشا ئیلۆنێ با (1961)، دبوو کو ژ وێ دەمێ دە کورد نەمابانا.
ھەگەر نە ژ شۆرەشا گولانێ (1976) یا کو شکل و شەمالا دەولەتبوونێ د سەرێ ھەر کوردەکی دە ب جھ کربوو، با، دبوو کو ئیرۆ کوردان بەحسا کوردستانەکا سەربخوە نەکربا. لۆما ئەز دبێژم؛
ملەتەکی بێ رێباز، زەحمەتە کو بکاربە خوە ژ بن دەستێ داگیرکەران ب رەحەتی ئازاد بکە. داگیرکەر ھار و ھۆڤن. داگیرکەر قاتلێ گەلێ مە نە. داگیرکەر ب ھەڤرە و ل گەل ھەڤ ژ بۆنا تونەکرنا کوردان و بارزانیان تەڤدگەرن. داگیرکەر خوەدی ھێز و قاوەتن. لەورا پێویستە کو ئەم کورد ژی ل ھەمبەر ھەمی زۆرداری و داگیرکەریا دژمن ھێزا خوە بکن یەک. ببن یەک قاوەت، ببن خوەدی نەرینەکا نەتەوەیی و رێبازەکێ دا کو ئەم بکاربن ب سەرکەڤن…
کورد و بارزانیێن د بن دەستێ چار داگیرکەر و ھەڤالبەندێن وان دە ھەر تەکۆشینا ئازادیا خوە ددن، دانە و وێ ھێژ ژی بدن. لێ ژ بلی باشوورێ کوردستانێ پارچەیێن دن د چ رەوشێ دە نە، دیارە. .ئازادی و سەرخوەبوونا کوردستانێ نە رەحەتە. ژ بەر کو داگیرکەران تم ژی ھەڤالبەندێن خوە ژ ناڤا مە دەرخستنە، گەلەک ژ کوردان و ھندەک ژ پارتیێن کوردان کرنە ھەڤالبەندێن خوە. وان خورت و ب چەک دکن دا کو کورد خوە ب خوە شەرێ ھەڤدو بکن. ئاھا ئەڤەیە یا زەحمەت کو ئیرۆ ئەم وەکە ملەتەک ئێشا وێ دکشینن.
ئیرۆ ھەمی داگیرکەرێن مە و ھندەک ژ دەولەتێن دن ل سەر سەرێ مە ئاگر پێخستنە. ژ بۆنا ڤەمراندنا ڤی ئاگری بارزانیان تم دەستێن خوە شەوتاندنە دا کو وەلات نەشەوتە. تم ئەو ئاگر ڤەمراندنە و تەفاندنە. لێ نھا یا خەراب ئەوە کو ئاگر ئێدی ب دەستێ کوردێن خولامتیا داگیرکەران دکن پێ دکەڤە.
لۆما پێویستە ئەم ژی خوە ل گۆر رێبازا بارزانی ب رێخستنی بکن. دا کو تەکۆشینێ بکین ژ بۆی دۆزا گەلێ خوە یا ژ بۆنا مان و نەمانێ. ئازادیا پارچەیەکی تاریا ل سەر پارچەیێن دن ژی رادکە. ئازادیا پارچەیەکی رەحەتی و سەربەستیێ ژ بۆی پارچەیێن دن تینە.
ژ بەر ڤێیە دڤێت ھەمی کورد، ئیرۆ ژ بۆنا سەرخوەبوونا باشوورێ کوردستانێ ب ھەڤرە، دەست ب دەست، مل ب مل کار و خەباتێ بکن. وەکە بەرێز مەسعوود بارزانی گۆتبوو: “گوندەکی سەربخوە ژ وەلاتەکی بندەست باشترە”.
پێویستە کو ئەم ئاگاھدار بن، شیار بن و ژ بۆنا پاراستنا دەستکەفتیێن باشوورێ کوردستانێ، ل سەر لنگێ خوە بمینە دا کو رۆژەکێ ور ببە سەربخوە. لۆما دڤێت ھەمی کورد دەست بدن ھەڤ. ئاھا خوەدی ل رێبازێ دەرکەتاندن و خورتکرنا وێ وەھا دبە. ژ بەر کو رەوشا باشوورێ کوردستانێ قەدەرا پارچەیێن دن ژی دیار دکە. یێ ژ بۆنا ڤێ ژی ئەڤ سەد سالن بەرخوە ددن بارزانی نە. یێ نھا ژی دخوازن ژ بۆنا مە کوردستانەکا سەربخوە ل گۆر رێبازا پیرۆز، راگھینە دیسا بارزانی نە.
ژ بۆنا بارزانی دۆزا گەلێ مە ل سەر ئەساسێ رێبازێ دمەشینن، تێنە حەزکرن. کار و خەباتێن وان یێن ب سالان، ئارمانج و بەرخوەدانێن وان ھەمی ژی ژ بۆنا کوردستانەکا سەربخوەیە. ئاھا بارزانیان ئەڤە کرنە و ڤێ دکن. لۆما دڤێت ئەم ئیرۆ ڤێ نەرینێ، ڤێ رێبازێ خورت بکن دا کو ھەمی پارچەیێن دن بگەهنە ئازادیا خوە.
