رۆژنامەڤانەکی رۆژئاڤایێ کوردستانێ دبێژە، “د دەما کو رێڤەبەریا خوەسەر تاوانبار و بازرگانێن مادەیێن ھشبەر سەربەست بەرددە، چالاکڤان و سیاسەتمەداران بنچاڤ دکە.”
رێڤەبەریا خوەسەر رۆژا 17 تیرمەھێ “لێبۆرینەکا گشتی” ژ بۆ تاوانێن تەرۆرێ و تاوانێن ل دژی ئەولەکاریا رێڤەبەریا خوەسەر ھاتنە کرن، راگھاندبوو.
رۆژنامەڤان بارزان حوسێن کو پێشتر چەند جاران ئەو ب خوە ژی ژ ئالیێ ھێزێن سەر ب رێڤەبەریا خوەسەر ڤە ھاتبوو رەڤاندن، دەربارێ “لیبۆرینا گشتی”یا رێڤەبەریا خوەسەر دە، دبێژە: “ئەم وەک گەلێ رۆژئاڤایێ کوردستانێ دلخوەش دبن دەما کو لێبۆرینەکا گشتی تێ راگھاندن، لێ مخابن، بازرگانێن مادەیێن ھشبەر و تەرۆریست ب ڤان لێبۆرینان تێن بەردان.”
بارزان حوسێن ددە زانین: “ئەم ئاگاھدارن کو نێزیکی 250 کەسێن کو د سایلۆیێن رەقایێ دە گرتیبوون کو پێوەندیا وان لگەل داعشێ ھەبوون و تاوانێن گران ئەنجام دابوون، ھاتن بەردان. لێ مخابن رۆژنامەڤان، چالاکڤان، رەوشەنبیر و سیاسەتمەدار و کەسێن خوەدی نێرین و ھەلوەستێن سیاسی گرتی مانە.”
ھەروھا دبێژە: “ژ داویا مەھا ئادارا بۆری ڤە، 15 کەس کو چالاکڤان و ئەندامێن پارتیێن د ناڤا ئەنەکەسێ دە نە گرتی نە کو یەک ژ وان برایێ منە. ھەتا نھا 4 ژ وان ھاتنە ئازادکرن، لێ چارەنڤیسا 11 کەسان ھەتا نھا نە دیارە کو یەک ژ وان برایێ منە، ئەڤ 108 رۆژن چارەنڤیسا وی نە دیارە.”
رۆژنامەڤان بارزان حوسێن دبێژە ژی: “ھەتا نھا ئەم نزانن گونەھا برایێ من و کەسێن دن چیە کو د ناڤا وان دە چەند رۆژنامەڤان ھەنە و یەک ژ وان ژی ژنە و ناڤێ بێریڤان ئیسماعیلە. ئەو 11 کەسێن گرتی ژی، رۆژنامەڤان، چالاکڤان و کەسێن خوەدی ھەلوەستێن سیاسی نە.”
دیار دکە ژی، “ئەم وەک مالباتێن رەڤاندیان، مە گەلەک جاران ل دەریێ دەزگەھێن ئەولەھیێ یێن رێڤەبەریا خوەسەر دان، تا کو بزانن ئەو ژ بەر چ ھاتنە گرتن، لێ ئەم بێ بەرسڤ دمینن.”
بارزان حوسێن بەحسا ئاوایێ رەڤاندنا برایێ خوە کر و گۆت: “برایێ من دەما سبێ دچوو سەر کارێ خوە، ئۆتۆمۆبیلەکا کو جامێن وێ رەش بوون ھات و کەسێن کو سەر و روویێن وان گرتی بوون برایێ من گرت و دەستدرێژی ل پێش چاڤێن کورێ وی یێ 9 سالی کرن. برازیێ من ھەتا نھا ژ بەر وێ رفتارا چەکداران، دەروونیا وی تێک چوویە. ئەڤ ئاوا و چاوانیا گرتنێ ب راستی ژ ئالیێ خەلکێ رۆژئاڤایێ کوردستانێ ڤە نایێ قەبوولکرن.
رۆژنامەڤان بارزان حوسێن ئاماژە ب وێ ژی دکە، “ئەڤ رەڤاندنا چالاکڤان، رۆژنامەڤان و سیاسەتمەداران، باندۆرێ ل یەکگرتیا جڤاکی دکە و زیانێ دگھینە یەکرێزی و یەکھەلوەستیا سیاسی یا کو خەونە ژ بۆی ھەموو کوردان.”
