رێخستنا “جوانێن شۆرەشگەر” یا گرێدایی پارتیا کارکەرێن کوردستانێ، کەچەکا کۆچبەرا عەفرینێ ب ئارمانجا تەڤلیکرنا وێ د ناڤا رەفێن پەکەکێ دە رەڤاندن.
ل گۆری رەوانگەھا سووری یا مافێن مرۆڤان، رێخستنا “جوانێن شۆرەشگەر” زارۆکا 14 سالی یا ب ناڤێ “سیدرا حسێن عەبدولحەنان” کو ژ گوندێ باخجە یێ ناڤچەیا بولبولێ یا گوندەوارێ عەفرینێ کۆچبەر بووبوو، رەڤاند.
زارۆکا ب ناڤێ سیدرا لگەل دایکا خوە و دو خوشکێن خوە ل ھەرێما شەھبا ل گوندەوارێ باکورێ حەلەبێ دژیا، کو د 16 ڤێ مەھێ دە ژ ئالیێ رێخستنا “جوانێن شۆرەشگەر” ڤە ھات رەڤاندن.
ل گۆری رەوانگەھا سووری بۆ مافێن مرۆڤان، ئەندامێن “جوانێن شۆرەشگەر” سیدرایا زارۆک ل بەر دەرێ مالا وێ رەڤاندیە، جوانێن شۆرەشگەر ژ رەوشا تێکچوویی یا مالباتێ سوود ورگرتیە، ژ بەر کو دایکا وێ پشتی کو ژ مێرێ خوە جودا بووی لگەل کەچێن خوە ب تەنێ دژیا، هەر وەها سوود ژ نەبوونا دایکا وێ د وێ دەمێ دە د مالێ دە وەرگرتیە، ئەڤ کەچ ب ئۆتۆمۆبیلەکێ ڤە ھاتە رەڤاندن، داپیرا زارۆکێ ئۆتۆمۆبیل ل بەر دەرێ مالێ دیت و پشتی سوار کرنا کەچا بچووک ئۆتۆمۆبیل ب لەز ژ وێ دەرێ دوور کەت و هەیا نها چارەنڤیسا ڤێ کەچێ نەدیارە.
ب گۆتنا یەک ژ کەسێن نێزیکی وێ زارۆکێ، بەری ڤێ یەکێ سێ ھەڤالێن وێ ل دبستانێ ھاتنە رەڤاندن و ئەندامێن “جوانێن شۆرەشگەر” ب رۆژان بەری رەڤاندنا وێ ھەول دان کو زارۆکێ رازی بکن کو لگەل وان بچە.
مالباتا کەچێ ژ چارەنڤیسا وێ پر دترسە و داخوازا ڤەگەراندنا وێ دکن.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
