ئه‌نفالا خوه‌زایا به‌هدینان ب سپۆنسه‌ریا په‌كه‌كێ ده‌وام دكه‌

ئارتێشا تركیێ ب ئێریشێن ئاسمانی د 3 رۆژان ده‌ ب ده‌هان بۆمبه‌ ل سه‌ر 7 گوند و ناڤچه‌یێن دهۆكێ باراندنه‌، په‌كه‌كێ‌ لڤ و ته‌ڤگه‌را خوه‌ یا ل دۆربه‌را گوندان زێده‌ كریه‌ و ب ڤێ سه‌ده‌مێ ئه‌ڤ گوند ده‌وام دكه‌ڤنه‌ به‌ر ئێریشان و شه‌وات و زرارێن پر مه‌زن چێبوونه‌ كو شێنیێن دهۆكێ ب ئه‌نفالا خوه‌زایا به‌هدینان ناڤكرنه‌.

ل گۆری بیلانچۆیا 3 رۆژێن 18، 19 و 20 تیرمه‌ها ئیسال 2024ێ یا ئێریشێن تركیێ و پاشڤه‌كشینا په‌كه‌كێ، 7 گوند و ناڤچه‌یێن دیار یێن دهۆكێ كه‌تنه‌ به‌ر ئێریشان.

گوندێن كه‌تنه‌ به‌ر ئێریشان:

1. سەرێ چیایێ خێرێ ل هنداڤی گوندێ چەم ربەتێ.

2. تۆنێلا ‎په‌كه‌كێ‏ ل چیایێ هنداڤی گوهەرزێ.

3. گوندێ سپیندارێ.

4. گوندێ ئۆرە.

5. دەریێ بێرا ل هنداڤی گوندێ بەرچی.

6. گەلیێ بازێ.

7. گوندێ دەرگەلا مووسا بەگێ.

ئێریش ووسا بوون:

ل 2024/7/18:

• دەمژمێر ‎1:30‏ نیڤرۆ بالافرێن ئارتێشا تركیێ سەرێ چیایێ خێرێ ل هنداڤی گوندێ چەم ربەتێ ل ناحیا چەمانکێ ‏ – دەڤەرا نەهلێ بۆردومانکریە و شه‌وات ب چیا كه‌ت.

• دەمژمێر ‎7:31‏ مەغرەب بالافرێن ئارتێشا تركیێ تۆنێلا ‎په‌كه‌كێ‏ یا ل چیایێ هنداڤی گوندێ گوهەرزێ بۆردومانکریە، هەروەها ل دەمژمێر ‎7:36‏ مەغرەب گوندێ سپیندارێ ل دەڤەرا بەرێ گارە بۆردومانکریە.

ل 2024/7/19:

• دەمژمێر ‎12:10‏ نیڤرۆ ژ ئەنجامێ بۆردومانا تۆپخانه‌یێن ئارتێشا تركیێ شه‌وات ب ئاقارێ گوندێ ئۆرە ‏ل دەڤەرا بەرواری بالا كه‌ت.

• دەمژمێر ‎5:10‏ ئێڤاری بالافرێن ئارتێشا تركیێ تۆنێلا په‌كه‌كێ‏ ل چیایێ هنداڤی گوندێ گوهەرزێ بۆردومانکریە.

• دەمژمێر ‎7:40‏ مەغرەب تۆپخانه‌یا ئارتێشا تركیێ دەریێ بێرا ل هنداڤی گوندێ بەرچی – ناحیا دێرەلۆک دەڤەرا نهێلییا تۆپبارانکریە.

ل 2024/7/20:

• دەمژمێر ‎3:20 بەری سپێدێ بالافرێن تركیێ ژ جۆرێ هەلیکۆپتەر تۆنێلا ل هنداڤی گوهەرزێ ب تەقه‌یا دۆشکێ و مووشەکا ب دژواری بۆردومانکریە.

• دەمژمێر ‎11:00‏ تا ‎12:40‏ نیڤرۆ تۆپخانه‌یێن ئارتێشا تركیێ گوللـه‌ تۆپ ‎‏ل گەلیێ بازێ یێ دەڤەرا بەرواری بالا خستنه‌.

• دەمژمێر ‎6:45‏ ئێڤاری بالافرێن ئارتێشا تركیێ گوندێ دەرگەلا مووسا بەگێ ل دەڤەرا بەرواری بالا بۆردومانکریە و یه‌ك مووشەک لێخستیه‌.

ئارتێشا تركیێ پێتری مه‌هه‌كێ یه‌ ئێریشه‌كه‌ دژوار ل دژی رێخستنا په‌كه‌كێ ل باشوورێ كوردستانێ دا یه‌ ده‌ستپێكرن، رۆژانه‌ گوندێن سینۆرێ پارێزگه‌ها دهۆكێ ب سه‌ده‌ما لڤ و ته‌ڤگه‌رێن په‌كه‌كێ دكه‌ڤن به‌ر ئێریشان و رووبه‌رێن هه‌ری به‌رفه‌ره‌هـ یێن ئاقارێن گوندێن دهۆكێ شه‌وتینه‌ و زراره‌كه‌ مه‌زن چێبوویه‌.