ئیرۆ 36 سال ب سەر کیمیابارانکرنا گوندێن زەردە و ناسردێرایێ یێن پارێزگەھا کرماشانێ یا رۆژھلاتێ کوردستانێ دەرباس دبن کو د شەرێ 8 سالی یێ ئیراق و ئیرانێ دە، ژ ئالیێ ئارتێشا ئیراقێ ڤە ب چەکێن کیمیایی ھاتن بۆمبەکرن.
ئیرانێ ئاماژە ب راپۆرەکا کۆمیسیۆنا تایبەت یا نەتەوەیێن یەکگرتی یا دەربارێ شەرێ ژ سالا 1980 ھەتا 1988 کر و راگھاند، ئارتێشا ئیراقێ 1800 تۆن گازا خەردەل، 140 تۆن گازا تابون و 600 تۆن گازا سارین بکار ئانیە.
ل گۆری راپۆرتا نەتەوەیێن یەکبوویی، ئارتێشا ئیراقێ د ئێرشێن خوەیێن ل سەر سینۆرێ ئیران و رۆژھلاتێ کوردستانێ دە، 19 ھەزار و 500 مووشەک، 54 ھەزار تۆپ و 27 ھەزار مووشەکێن مامناڤەند بکار ئانینە.
گوندێ زەردە ل دەڤەرا رێژاو، ل بلنداھیێن باژارێ دالاھۆ دکەڤە و 140 کیلۆمەترەیان ل رۆژئاڤایێ باژارێ کرماشانێ دوورە. خەلکێ گوند ژ سالا 1988 و ڤر ڤە ژ بەر باندۆرا چەکێن کیمیەوی، ب نەخوەشیێن جووربەجووریێن ھەناسە، کۆری و کەڕبوون، ھەستیاریا چەرمی کەتن. باندۆر ل سەر بریندارێن چەکێن کیمیەوی رانەوەستیانە، بەلکوو پشتی کارەساتێ ئەو نەخوەشی دەرباسی نفشێن د پشترە ژی بوونە.
سبەھا رۆژا ئینێ 22 تیرمەھا 1988، کێمی سێ ھەفتەیان بەریا راگھاندنا ئاگربەستێ، ئارتێشا ئیراقێ ب چەند فرۆکەیێن شەر گوندێ زەردە بۆمبەباران کر، د ئەنجامێ دە 275 سڤیل ھاتن کوشتن و ب سەدان ژی بریندار بوون. د ھەمان رۆژێ دە ئارتێشا ئیراقێ ب چەکێن کیمیایی ئێرشی گوندێ ناسردێرایێ یێ سەر ب باژارێ گایلەنخەربی یێ رۆژھلاتێ کوردستانێ کر، کو د ئەنجامێ دە 4 وەلاتێ شەھید بوون و زێدەتری 1000 وەلاتیێن دن ژی بریندار بوون.
