رێڤەبەریا خوەسەر ل گۆری «لێبۆرینا گشتی»، 140 گرتیێن داعشێ ژ زیندانا ئەلایا ل باژارێ قامشلۆ سەربەست بەردان.
چالاکڤانێن باژارێ قامشلۆ بەلاڤ کرن، رێڤەبەریا خوەسەر ئیرۆ 22 تیرمەهێ 140 گرتیێن کو ب تاوانێن «داعشێ» هاتبوون گرتن، ژ زبندانا ئەلایا یا قامشلۆ سەربەست بەردان.
دوهی ژی دەستەیا دادوەریا جڤاکی د رێڤەبەریا خوەسەر دە، 180 گرتیێن داعشێ ژ زیندانا خوێرانێ یا باژارێ حەسەکێ سەربەست بەردابوون.
رێڤەبەریا خوەسەر رۆژا 17ێ تیرمەهێ «لێبۆرینەکە گشتی» ژ بۆ تاوانێن تەرۆرێ و تاوانێن ل دژی ئەولەکاریا رێڤەبەریا خوەسەر هاتنە کرن، راگهاندبوو.
د چارچۆڤەیا ڤێ لێبۆرینێ دە، تێ پلانکرن کو نێزی 1500 گرتی ژ گرتیگەهێن رێڤەبەریا خوەسەر د ناڤا ڤێ حەفتەیێ بێن بەردان.
ل گۆری لێبۆرینێ، میر، سەرۆکێن رێخستنێن تەرۆریست، بەشدارێن تەقینان و کەسێن شەرێ ل دژی هه‌سه‌دێ کرنە و بوونە سەدەما مرنان، ناین دەرخستن.
