فەرمانداریا ئۆپەراسیۆنێن رۆژئاڤایێ نەینەوایێ ھشیاری دا کو ئەندامێن داعشێ دخوازن خوە بگەھینن ئیراقێ کو خوەدی ناسنامەیا ئیراقێ نە و ڤێ داویێ ژ ئالیێ ئیدارەیا خوەسەر یا باکور و رۆژھلاتێ سووریێ ڤە ھاتنە ئازادکرن.
رۆژا 17/7/2024 ئیدارەیا خوەسەر یا رۆژئاڤایێ کوردستانێ یاسایا لێبۆرینا گشتی ژ بۆ وان تاوانان پەژراند کو یاسایا دژەتەرۆرا ب ھەژمارا 7 یا سالا 2024 وان ل خوە دگرە.
یاسا ژ 6 مادەیان پێکھاتیە، کو سزایێ نیڤ زیندانیکرنا دەمکی و گوھەرتنا سزایێ ھەتا ھەتایی کو دبە 15 سال زیندانیکرنێ. ھەروھا عەفوویا ل ھەموو سزایێن دەمکی و ھەتا ھەتایی ژ بۆ وان سزایان تێ دایین کو نەخوەشیێن کوژەک وان ھەبە و ئەوێن کو تەمەنێن وان ل سەر 75 سالیێ بە.
ئەڤ لێبۆرین و عەفوو کو ب رێیا ناڤبەینکاریا عەشیرەتێن عەرەب ل گەل ئیدارەیا خوەسەرا رۆژئاڤایێ کوردستانێ ڤە ھاتیە پێکانین، کو ئیدارەیەکا گرێدای ب بریارێن قەندیل و پەکەکێ ڤەیە، ئەمیر و رێڤەبەرێن رێخستنا تەرۆریست و ئەوێن کو بەشدارن ل بۆمبەباران و دژمناتیا دژی ھێزێن سووریا دەمۆکرات (ھەسەدێ)ێ و ھەروھا ئەو تاوانێن کو بوونە سەدەمێ جان ژ دەست دانا کەسەکی ل خوە دگرە.
ھەژمارا وان کەسێن ژ بەر وێ بریارا عەفوو و لێبۆرینێ ھاتنە ئازادکرن گەھەشتیە زێدەتری ھەزار کەسان و ژ وێ ھەژمارێ ژی ل گۆر زانیاریان 470 کەس ئیراقی بوون و ھەژمارەک ژ وان کەسێن ھاتنە ئازادکرن ژی ھەولا ڤەگەرێ و دەرباسبوونا بۆ ناڤ ئاخا ئیراقێ ددن.
ل گۆر زانیاریێن ئەولەھیێ ھەژمارەک ژ وان داعشیێن ھاتنە ئازادکرن ھەول دانە خوە بگەھینن ناڤ ئاخا ئیراقێ و ژ بەر وێ ژی فەرمانداریا ئۆپەراسیۆنێن رۆژئاڤایێ نەینەوایێ د پەیامەکی دە داخوازا وەرگرتنا تەدبیر و رێنیشاندەریێن خوە پاراستنێ و ھشیاریێ دایە ھێزێن ئەولەھیێ.
