رێڤەبەریا خوەسەر لێبۆرینەکە گشتی ژ بۆ ئازادکرنا ئەندامێن رێکخستنا داعشێ ژ زیندانێن خوە ل سەرانسەری رۆژئاڤایێ کوردستانێ دەرخست، حكوومه‌تا ئیراقێ ژی ژ ترسا دوبارە بهێزبوونا وێ رێکخستنێ زێرەڤانیا سنۆرێن خوەیێن ب سووریەیێ رە موکۆمتر کر، فه‌رماندارێ هێزا پێشمه‌رگه ل شه‌نگال ژی ئه‌ڤ یێك ب پیلانا هه‌ری خه‌ته‌ر یا رێخستنا په‌كه‌كێ ناڤ كر.
ب دەربازبوونا کێمتر ژ هەفتیەکێ ل سەر دەرخستنا بریارا لێبۆرینا گشتی ژ بۆ زیندانێن گرێدایی رێڤەبەریا خوەسەر، هێزێن سووریەیا دەمۆکراتیک کو وەکی هه‌سه‌ده تێ ناسکرن کاروانەکی هەزار و 500 زیندانیان ژ زیندانێن خوە ئازاد کر، کو گۆمان تێ کرن چەکدار و ئەندامێن داعشێ بن.
هەژمارەکە وان زیندانیێن هاتنە ئازادکرن سزایێ 10 سالێن زیندانیکرنێ ل سەر هەبوو لێ تەنێ دو سالان د زیندانێ دە مایە، هەژمارەکە وان ژی ب چار سالان هاتبوون زیندانیکرن لێ تەنێ سالەکێ د زیندانێ دە مانە و هاتنە ئازادکرن.
په‌كه‌كه بۆ كێمكرنا فشارا ل سه‌ر خوه ته‌رۆریستێن داعشێ ئازاد دكه
د ڤێ ده‌ربارێ ده قاسم شه‌شۆ فه‌رماندارێ هێزا پێشمه‌رگه ل شه‌نگالێ ئاشکەرە کر، پارتیا کارکەرێن کوردستانێ (په‌كه‌كه) دەست ب لیستکەکە مەترسیدار کریە و کارتا داعشێ بکار ئانیە و دخوازە فشارێن ل سەر ئیراق و ترکیێ ل سەر په‌كه‌كێ کێم بکە.
په‌كه‌كێ ب هەزاران چەکدارێن داعشێ ژ زیندانێن رۆژئاڤایێ کوردستانێ ئازاد کر و ئەڤ یەک ژی بوو سەدەما ترسا نیشتەجهێن مووسلێ و پارێزگەها نەینەوایێ ب گشتی و هێزێن ئەولەهیێ یێن ئیراقێ ژی ل سەر سینۆرێ سووریێ بجهـ بوونە.
فەرماندەیێ پێشمەرگە ل شنگالێ قاسم شەشۆ گۆت: په‌كه‌كێ لێبۆرینا گشتی بۆ زێدەتری 1500 چەکدارێن داعشێ ژ زیندانێن خوە دەرخستیە و دێ د دو قۆناغان دە وان ئازاد بکە. د قۆناغا یەکەم دە هەزار و 112 چه‌كدار ژ زیندانا رەقایێ ئازاد کرن و د قۆناغا دویەمین دە ژی دێ 400 چه‌كدارێن دن ئازاد بکە.
خه‌ته‌ریا ڤه‌گه‌را ته‌رۆریستان بۆ نه‌ینه‌وایێ
هه‌ر وها ده‌ستنیشان كر، په‌كه‌كه لیستکەکە ترسناک دلیزە. دزانە کو ئه‌و ل قەندیلێ كه‌تیه ژێر فشارا ترکیێ و ل سلێمانیێ ژی كه‌تیه ته‌نگاسیێ و دزانه كو ئێدی دەستهلاتدارێن وێ دەرێ ژی نکارن گوهـ نەدن تەڤگەرێن په‌كه‌كێ. لوما ژی ئازادكرنا چه‌كدارێن خه‌ته‌ر یێن داعشێ ژ هێلا هه‌سه‌دێ ڤه خه‌ته‌ری ل سه‌ر سینۆرێ مه ژی چێكرنه ژ به‌ر كو مەترسی هەیە کو ئه‌ڤ چه‌كدارێن داعشێ وەرن پارێزگەها نینەوایێ و رەوشا ئەولەهیێ جارەکە دن خراب ببە».
قاسم شەشۆ داخواز ژ سەرۆکوەزیرێ ئیراقێ و ئالیێن پەیوەندیدار کر کو ب جدی ل سەر گەفا کەرتا کو ژ ئالیێ په‌كه‌كێ ڤە هاتیە بکارئانین، بسەکنن و پشتگوهـ نەکن.
مه‌زلووم عه‌بدی: پلانا مە وەسایە کو ئەم هەمی گرتیان ئازاد بکن
فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عەبدی د دەرهەقا چارەنڤیسا ئەندامێن داعشێ یێن گرتی و ئازادکرنا وان دە گۆت، «مە د پێنگاڤا یەکێ دە نێزی هەزار و 500 زیندانیان ئازاد کرنە، پلانا مە وەسایە کو ئەم هەمی گرتیان ئازاد بکن، تەنێ ئەو نەبنێن کو دەستێن وان ب خوینێ سۆر بوونە، تەڤی وان چەکدارێن بیانی یێن کو د ناڤ رێزێن رێکخستنا داعشێ دە شەر کریە».
رۆژئاڤایێ نینەوایێ ته‌دبیرێن خوه‌پاراستنێ هاتنه وه‌رگرتن
ژ هێلا خوه ڤه، محەمەد شەمەری، ژ فەرماندارییا ئۆپەراسیۆنێن رۆژئاڤایێ نینەوایێ، ژ رۆژنامەیا ئەل-عەرەبی ئەل-جەدید رە راگهاند کو هێزێن ئیراقی تەدبیرێن خوه‌پاراستنێ گرتنە ژ بۆ رێگرتنێ ل هەر کەتنه‌كه ب گومان بۆ ناڤ سینۆرێن ئیراقێ ژ ئالیێ سووریێ ڤه و گۆ كو ب درێژاهییا 200 كم وان هێز به‌لاڤه كرنه.
رۆژنامەیێ گۆت کو کامەرایێن چاڤدێریێ ل سەر سینۆرێ ئیراق-سووریە ل پارێزگەها نینەوایێ هاتنە دانین.
10 هه‌زار داعشی د زیندانێن رێڤه‌به‌رییا خوه‌سه‌ر دا نه
نێزی دەهـ هەزار چەکدار و ئەندامێن رێکخستنا داعشێ د زیندانێن ل ژێر دەستهلاتا رێڤەبەریا خوەسەر ل رۆژئاڤایێ کوردستانێ دە هەنە، ژ وان ژی نێزی دو هەزاران خەلکێ بیانینە.
رێڤەبەریا خوەسەر ل باکورێ رۆژهلاتێ سووریەیێ (رۆژئاڤایێ کوردستانێ) ل رۆژا 17.07.2024ێ لێبۆرینەکە گشتی دەرخست و بریار دا کو هەمی کەسێن خەلکێ سووریەیێ ئازاد بکە یێن کو هەتا بەری دەرکەفتنا وێ بریارا لێبۆرینا گشتی ژی هاتبوون زیندانیکرن.
وەکی پێنگاڤا یەکێ یا بجهانینا وێ بریارێ ژی، ل دوو زانیاران، زێدەتری هەزار و 500 کەسان هاتنە ئازادکرن کو پرانیا وان ئەندامێن رێکخستنا داعشێ نە.
حكوومه‌تا ئیراقێ نیگه‌رانه
ئەڤ پێنگاڤا رێڤەبەریا خوەسەر و هێزێن سووریەیا دەمۆکراتیک بوویە سەدەما نیگەرانیا حكوومه‌تا ئیراقێ یا فەدەرالی، هەروەسا ترس هەیە کو ئەندامێن ئازادکری یێن داعشێ ژ سووریەیێ دەربازی سینۆرێ ئیراقێ ببن، ژ بۆ کو دوبارە نەیێن گرتن و ئەڤ ژی پێنگاڤەک بە ژ بۆ دوبارە خوەرێکخستنا داعشێ ل ئیراقێ و بهێزبوونا وێ.
هەر ب بەلاڤبوونا دەرخستنا وێ بریارا لێبۆرینا گشتی یا رێڤەبەریا خوەسەر رە، ئارتێشا ئیراقێ هێزەکە زێدەتر شاندیە سەر سنۆرێن خوەیێن ب سووریەیێ رە ژ بۆ کو رێیێ ل دەربازبوونا چەکدارێن داعشێ بگرن.
