دو کۆلبەرێن کوردێن رۆژهلاتێ کوردستانێ ل سەر سینۆرێ رۆژهلات و باشوورێ کوردستانێ ژ ئالیێ هێزێن چەکدارێن ئیرانێ ڤە هاتن کوشتن و چار کۆلبەر ژی بریندار بوون.
رێخستنا مافێن مرۆڤان (هەنگاو) بەلاڤ کر، هێزێن ئەولەهیێ یێن ئیرانێ ئیرۆ 27ێ تیرمەهێ ل سینۆرێ نەوسوودێ کۆلبەرەکی ب ناڤێ نازم سەفەری یێ 26 سالی دانە بەر گولەیان و هاتیە کوشتن.
دا زانین ژی، ل سینۆرێ مەریوانێ ژی کۆلبەرەکی ب ناڤێ ئیحسان نەورۆزی یێ 25 سالی ب گولەیێن راستەراست یێن هێزێن ئیرانێ ڤە هاتیە کوشتن. ئەو کۆلبەرێ جوان خەلکێ باژارێ گیەلانا سەر ب پارێزگەها کرماشانێ یە.
هەنگاوێ راگەهاند، دوهی ژی 4 کۆلبەرێن خەلکێ گوندێ دشەیێ سەر ب باژارێ پاوە ڤە د دەما کۆلبەریێ دە بوو، ل سینۆرێ نەوسوودێ ژ ئالیێ هێزێن چەکدارێن ئیرانێ ڤە هاتنە گرتن و ئەشکەنجەکرن.
هات راگەهاندن ئەو هەر 4 کۆلبەر ژ بۆ دەرمانکرنێ، ژ بۆ ناڤەندێن تەندورستیێ هاتنە راکرن.
