ژ بەر ئێریشێن داعشا رێخستنا تەرۆرێ هەتا نها 150 هەزار مالبات هێ ژی نکارن ڤەگەرن مالێن خوە و هات دیارکرن کو د دەمێن داوین دا سەدەما ڤەنەگەرینا وان ژ بەر داگیرکەریا په‌كه‌كێ یا ل شەنگالێ یە.
ئەندامێ کۆمیسیۆنا کۆچ و کۆچبەران یا مەجلیسا ئیراقێ شەریف سلێمان دەر بارێ مژارێ دا ئاخڤی و وها گۆت: «بریارا گرتنا کامپێن ل ئیراقێ هەتا داویا ڤێ مەهێ هەیە، لێ ئەز دبینم کو د ناڤ شەرت و مەرجێن نها دا ئەڤ یەک زەحمەتە و نه گونجاوە. ژ بۆ کو کۆچبەر ڤەگەرن مالێن خوە شەرت و مەرج نە د جی دانە».
ئەم دخوازن هەموو خالێن پەیمانا شەنگالێ وەرن سەپاندن
شەریف گۆت، پەیمانا شەنگالێ یا کو په‌كه‌كێ ژ هەرێمێ دەردخە ب جی نایێ و وها دەوام کر: «تێکۆشینا سیاسی و راگەشیا سیاسی یا ل شەنگالێ یەک ژ سەدەمێن سەرەکەیە کو کۆچبەر ڤەنەگەرن مالێن خوە. دڤێ حکوومەت بەرپرسیاریا خوە یا ژ بۆ ڤەگەرا کۆچبەران ب جی بینە. ژ سەدی 90ێ ڤان کۆچبەران نکارن مالێن خوە بکار بینن. ژ بۆ کو ئەو ڤەگەرن مالێن خوە دڤێ رەوشا وان یا ئەولەهیێ بێ باشکرن و پەیمانا شەنگالێ یا کو هاتیە ژبیرکرن ئان ژی پشتگوهکرن بکەڤە رەواجێ. ئەم دخوازن هەموو خالێن پەیمانا شەنگالێ وەرن سەپاندن کو کۆچبەر ژی بکاربن ڤەگەرن مالێن خوە. سەدەمەکە کو کۆچبەر نکارن ڤەگەرن مالێن خوە یەک ژێ ژی هەبوونا هێزێن چەکدارێن په‌كه‌كێ نە».
بەردەڤکێ وەزارەتا کۆچ و کۆچبەریێ یا ئیراقێ عەلی عەبباس ژی ب بیر خست، د سالا 2014ان دا ژ بەر ئێریشێن داعشا رێخستنا تەرۆرێ نێزی 900 هەزار مالبات مەجبوور مان و مالێن خوە تەرکاندن و دیار کر کو ئەڤ ل هەرێمێن ئەنبار، سەلاحەددین، دیالا، کەرکووک و مووسلێ نە.
22 هه‌زار مالباتێن شه‌نگالێ دكامپێن دهۆك و هه‌ولێرێ ده نكارن ژ به‌ر په‌كه‌كێ ڤه‌گه‌رن
عەبباس وها دەوام کر: «600 هەزار مالبات ڤەگەریان مالێن خوە. ڤێ گاڤێ د ناڤبەرا 120 و 150 هەزار مالبات ژی د ستاتویا کۆچبەرێن ناڤخوەیی دانە.
ژ 175 کامپێن چادرێ 153 هاتن گرتن. ڤێ گاڤێ تەنێ 22 کامپێن چادرێ هەنە. 16 ژێ ل دهۆکێ و 6 ل هەولێرێ نە. ژمارا کەسێن کو د کامپان دا دمینن نێزی 27 هەزار مالباتینە. 22 هەزارێ وان ژ شەنگالێنە.
د ناڤبەرا حکوومەتا ئیراقێ و حکوومەتا هەرێما کوردستانێ دە دا د 9ێ جۆتمەها 2020ان دا پەیمانا شەنگالێ هاتبوو ئیمزەکرن. ل گۆر ڤێ پەیمانێ دڤێ په‌كه‌كە ژ وێ دەرێ وەرە دەرخستن.
