سەرۆک بارزانی د 41ەمین سالڤەگەرا جینۆسایدا بارزانیان دە راگهاند، «ئەو تاوانێن کو ل دژی گەلێ کورد هاتنە کرن، هەموو ژی ژ ئەنجاما زهنیەتا شۆڤەنیست، خوەسەپین و نەمرۆڤانە یا دەستهلاتدارێن بەرێیێن ئیراقێ بوونە».
پەیاما سەرۆک مەسعوود بارزانی:
رەژیما بەرێ یا ئیراقێ ب کریارەکە نەرەوا و بێوژدانە، 8 هەزار بارزانیێن جوان و پیر ژ تەمەنێ نەهـ هەتا نۆت سالی گرتن، تەنێ ژ بەر کو بارزانی و کورد بوون، ل چۆلێن باشوورێ ئیراقێ ب ئاوایەکی نەمرۆڤانە کۆمکوژی کرن. ئەڤ تاوان بەشەک بوو ژ دەستپێکا زنجیرەیا تاوانێن کو ژ ئالیێ رەژیما بەرێ یا ئیراقێ ڤە ژ بۆ ژناڤبرنا گەلێ کوردستانێ هاتیە کرن، دەستپێکێ ژ ونداکرنا 12 هەزار جوانێن فەیلی و هەتا ئەنفال، کیمیابارانا ل سەرانسەرێ کوردستانێ، عەرەبکرن، کۆچبەرکرنا ب دارێ زۆرێ و گوهەرتنا دەمۆگرافیا کوردستانێ.
د 41 سالیا ئەنفالا بارزانیان دە، ئەم سلاڤ ل گیانێ شەهیدێن ئەنفالێ و هەموو شەهیدێن کوردستانێ دکن. هەر وها سپاسیا گەلێ ب ئەمەکێ کوردستانێ، ب تایبەتی خەلکێ دەشتا هەولێر، هەریر و سۆرانێ دکن کو د وێ دەما تەحل دە هەڤسۆزێ بارزانییان بوونە و ئالیکارییا وان کرن. ئەم سپاسیا کەسووکارێن قوربانیێن ئەنفالێ، ب تایبەتی داییک و ژنێن بارزانیانیێن کو بوونە میناکێن خوەراگری و قەهرەمانیێ بوون و ئازار بەندەواریێ، دووربوون و وەنداکرنا کەسووکارێن خوە دیتنە، دکن.
ئەو تاوانێن کو ل دژی گەلێ کوردستانێ هاتنە کرن، هەموو ژی ژ ئەنجاما زهنیەتا شۆڤەنیست، خوەسەپین و نەمرۆڤانە یا دەستهلاتدارێن بەرێیێن ئیراقێ بوونە. ئەڤ زیهنیەت ژ بۆ هەموو گەلێن ئیراق و هەرێمێ، بوویە سەدەما سەرەکە یا پاشکەتن، ئێش و کارەساتێ.
