ب دەستپێکرنا ئۆپەراسیۆنێن لەشکەرێ ترکیێ بۆ سەر چەکدارێن پەکەکێ د ناڤا ئاخا باشوورێ کوردستانێ، زرارەک مەزن گهشت خوەزایا کوردستانێ، هن جاران ب سەدەما مووشەک و بۆمبەیێن لەشکەرێ ترکیێ شەوات دەرکەتنە و هن جاران ژی چەکدارێن پەکەکێ ژ بۆی پاراستنا خوە ژ درۆن و لەشکەرێن ترک ئاگر ب خوەزایا کوردستانێ خستیە، هەری داوی چەند چەکدارێن پەکەکێ ل گوندێ دەرگەلا مووسا بەگێ و میسکا ئاگر ب رەز و باخ و ئاقارێ ڤان گوندان خستیە.
ل گۆر ئاگاهیێن تایبەت یێن پێگەها دارکا مازی، د رۆژا 30/6/2024 دە هەیانی 10/7/2024 بەرپرسێ هەرێمی یێ ئیستیخباراتا پەکەکێ یێ ب ناڤێ هەڤال کانی ب 10 چەکدارێن دن یێن پەکەکێ رە ئاگر بەردایە رەز و باخ و بیستان و ئاقارێ گوندێن دەرگەلا مووسابەگێ و میسکا یێن سەر ب ناحیا کانی ماسێ ل دەڤەرا بەرواری بالا.
چاڤکانیێن دارکا مازی تەکەز کرن، ڤان چەکدارێن پەکەکێ ژ بۆی دروستکرنا دوومانێ ئەڤ یەک پێک ئانیە، ژ بۆی کو بکاربن خوە ژ لەشکەرێ ترکیەیێ بپاریزن، لێ ب سەدەما ڤێ یەکێ پرانیا خانیێن وی گوندی هاتنە شەوتاندن و شێنیێن ڤان گوندان نەچار مانە گوندێن خوە چۆل بکن.
