نێچیرڤان بارزانی: پێویستە پەکەکە ل شنگالێ نەمینە و دڤێت ئێزدی بێن قەرەبوو کرن

سەرۆکێ ھەرێما کوردستانێ نێچیرڤان بارازانی راگەھاند، ئێزدی دڤێ ژ ھەموو ئالیان ڤە بێن قەرەبوو کرن، ھەروەھا دڤێت پەکەکە ل شنگالێ نەمینە.

ئیرۆ 3/8/2024ێ دەهەمین سال ل سەر ئێریشا رێخستنا تەرۆریستا داعشێ بۆ سەر شنگالێ وجینۆسایدا ئێزدیان دەرباس دبە. د مەراسیمەکە سالڤەگەرا وێ تەوانا مەزن دە سەرۆکێ ھەرێما کوردستانێ نێچیرڤان بارزانی گۆتارەک پێشکەش کر و د گۆتارا خوە دە ئاماژە ب وێ یەکێ کر کو دڤێت ژ ھەموو ئالیان ڤە ئێزدی بێن قەرەبوو کرن.

ھەروەھا راگەھاند، پشتی 10 سالان ژ وێ تەوانێ ھێژان ژی برینا وێ ڤەکری مایە و گۆت، جینۆسایدا ئێزدیان شۆکەکا مەزن بوو ژ بۆ ھەموو جیھانێ، و یەک ژ تەوانێن ھەری مەزنە د دیرۆکێ دە.

بارزانی گۆت، تشتا ژ بۆ ئێزدیان ھاتیە کرن تێرێ ناکە، ئەم ئاگاھدارێ رەوشا ئێزدیانین و پێویستە پەکەکە ل شنگالێ نەمینە.

سەرۆکێ ھەرێما کوردستانێ تەکەز کر دڤێت رێکەفتنا شنگالێ بهێت جیبجیکرن و ئێزدی بخوە کاروبارێن خوە برێڤە ببن.