سەرۆکوەزیرێ ھەرێما کوردستانێ مەسروور بارزانی ب بۆنەیا دەهەمین سالڤەگەرا جینۆسایدا وەلاتیێن ئێزدی پەیامەک بەلاڤ کر و تێ دە راگاھند، “ئەم تەکەزی ل سەر جیبجیکرنا رێکەفتنا شنگالێ وەک خوە دکن، ژ بۆ ڤەگەراندنا ئەولەھی و ئارامیێ بۆ ناڤچەیێ و پاراستن و برێڤەبرنا دەڤەرێ بکەڤە دەستێ خەلکێ رەسەنێ شنگالێ.”
سەرۆکوەزیر مەسروور بارزانی د پەیاما خوە دە گۆت: “ئیرۆ دەھ سال ل سەر جینۆسایدا خوشک و برایێن ئێزدی ل شنگالێ و دەردۆرا وێ دەرباس دبن، کو د ئەنجاما ئێریشێن ھۆڤانەیێن تەرۆریستێن داعشێ دە، ب ھەزاران کەس ژ روونشتڤانێن دەڤەرا شنگالێ ب کۆمی ھاتن کوشتن و ب دەهان هەزار کەس ژی وندا و کۆچبەر بوون.”
ھەروھا گۆت: “تەڤی کو دەھ سال ل سەر ڤێ تاوانێ دەرباس بوونە، لێ مخابن ئێش و ئازارێن خوشک و برایێن ئێزیدی ب داوی نەبوونە و گەلەک ژ وان هێژ وندا نە و ژ بەر خوەسەپاندنا ملیشیا و ھێزێن چەکدارێن دەریاسایی ل شنگالێ، رەوشا دەڤەرێ ڤەنەگەریایە رەوشا ئاسایی و کۆچبەر نەکارینە ڤەگەرن ناڤچەیێن خوە.”
سەرۆکوەزیر مەسروور بارزانی د پەیاما خوە دە گۆت: “د ڤێ بیرانینێ دە، ئەم قوربانیدانا ھێزێن پێشمەرگەیێن کوردستانێ ب رێبەرتیا سەرۆک بارزانی د رزگارکرنا شنگالێ دە بلند دنرخینن و ب رێز و پێزانینێ ڤە لێ دنێرن.”
بارزانی گۆت: “حکوومەتا ھەرێما کوردستانێ ھەولێن خوە لگەل حکوومەتا فەدەرال ژ بۆ ئاساییکرنا رەوشا نە لبارا ل شنگال و دەردۆرا وێ و کار ژ بۆ ئاڤەدانکرنا ناڤچەیێ تەکەز دکە. ژ بۆ رێ ل بەر ڤەگەرا سەربلندا خوشک و برایێن ئێزیدی یێن ئاوارەبوویی بۆ جھێن خوە، ڤەکە. ژ بەر وێ ژی ئەم تەکەزی ل سەر جیبجیکرنا رێکەفتنا شنگالێ وەک خوە دکن، ژ بۆ ڤەگەراندنا ئەولەھی و ئارامیێ بۆ ناڤچەیێ و پاراستن و برێڤەبرنا دەڤەرێ بکەڤە دەستێ خەلکێ رەسەنێ شنگالێ.”
سەرۆکوەزیر مەسروور بارزانی د داویا پەیاما خوە دە دبێژە، “ئەم بەژنا خوە ل ھەمبەر شەھید و قوربانیێن کۆمکوژیا شنگالێ و ھەموو شەھیدێن کوردستانێ دتەوینن.”
