دەما کو ئارتێشا ئیراقێ ب هەزاران هێزێن خوە ڤه ژ مووسلێ دەرکەتی و دەست ژ هەموو ئالاڤێن خوە یێن لەشکەری بەردای، ل کوردستانێ و ئیراقێ قۆناغه‌كه نوو دەست پێ کر. پشتی وێ هەیامێ، نێزیکی 2000 پێشمەرگەیێن کو ژ بۆ پاراستنا کوردستانێ چووینە چەپەرێن خوە، شەهید بوون. 1000 پێشمەرگە بریندار بوون. شەنگال د ڤان پەڤچوونان دە خوەدی جهەکی گەلەکی تایبەت بوو.
پشتی مووسلێ، هێزێن داعشێ دەرباسی باژارۆکێ تەله‌عفه‌رێ کو ترکمەن لێ دژین، بوون و پشتی کو گهیشتن دەردۆرا بەغدایێ، ب ئاوایەکی تاری بەرێ خوە دان کوردستانێ. د شه‌ڤه‌كێ ده و ژ نیشكانڤه باژارێ شەنگالێ ژ ئالیێ چەتەیێن داعشێ ڤە هاتە دۆرپێچکرن. هێزێن پێشمەرگە ژ بۆ رێگرتنێ ل ئێرشا داعشێ بۆ سەر کوردستانێ کەتن تەڤگەرێ.
ژ بۆ شکاندنا دۆرپێچا ل سەر شەنگالێ، هێزێن پێشمەرگەیان خوەستن رێیا زومارێ ڤەکن و ب چەتەیێن داعشێ رە شەرێن دژوار دەستپێ کرن.
یەکەمین هێزا کو ژ بۆ شکاندنا دۆرپێچا ل سەر شەنگالێ چالاکی پێک ئانی هێزا فەرماندە بژار خه‌لیل بەرواری (بێتکاری) بوو.
بژار بێتكاری کی یە؟
بژار بێتكاری، د سالا 1969ان دە ل گوندێ بێتكارێ یێ ده‌ڤه‌را بەرواری بالا ژ داییک بوویە، ژ مالباتەک وەلاتپارێز بوو. مالباتا وی ژ سالا 1940ان ڤە د ناڤا تێکۆشینا رزگاریا نەتەوی یا بارزانی دە بوو. د تەمەنەکی جوان دە بەشداری کۆمیتەیێن هەرێمی یێن په‌ده‌كێ بوو. د سالا 1991ان دە ب ئاوایەکی ئاکتیف تەڤلی راپەرینێ دبە.
د سالا 1992ان دە پەروەردەیا خوە یا پێشمەرگاتیێ ب داوی کر و وەکە جیدار دەست ب کار کر. د سالێن خوە یێن وەزیفەیێ دە بەشداری خەباتێن گرینگ بوو.
د سالا 2014ان دە ژ بۆ شکاندنا دۆرپێچا ل سەر شەنگالێ ل زومارێ هات وەزیفەدارکرن. د چالاکیا یەکەمین دە ژ بۆ شکاندنا چەپەرێن چەتەیێن داعشێ د چەپەرێن هەری پێش دە شەر کر. د شەرێ ل دژی چەتەیێن داعشێ ده ل نێزی زومارێ تەڤی هەڤرێیێن خوە سەفەر ستوکورکی (بەرواری) و لوقمان کۆره‌مارکی (دۆسکی) شەهید بوون.
