ب بریارا سەرۆکوەزیرێ هەرێما کوردستانێ مەسروور بارزانی ئالیکاریێن دارایی ل سەر زێدەتری 3 هەزار و 500 وەلاتیێن ئێزیدییێن کو ژ دەستێ تەرۆریستێن داعشێ رزگار بوونە، تێن دابەشکرن.
سەرۆکێ بنکەیا چاندی و جڤاکی یا لالەشێ سه‌عید جردۆ ئیرۆ 4ێ تیرمەهێ د کۆنگرەیەکە رۆژنامەڤانی دە گۆت: «ئالیکاریێن دارایی ژ بۆ هەموو وەلاتیێن ئێزدی یێن کو ژ دەستێ داعشێ هاتنە رزگارکرن، دبە، هەتا ئەوێن کو پشتی رزگاربوونا خوە چوونە دەرڤەیی وەلات ژی».
سەعید جردۆ دیار کر، وەلاتیێن ئێزدییێن ل دەرڤەیی وەلات دژین، دکارن ئۆنلاین فۆرما خوە داگرن کو دێ رۆژا یەکشەمێ ژ ئالیێ بنکەیا لالەشێ ڤە بێن بەلاڤکرن.
سەرۆکێ بنکەیا لالەشێ سپاسیا سەرۆکوەزیر مەسروور بارزانی کر، ژ بۆ پێشکێشکرنا وان ئالیکاریێن دارایی و تەکەزی ل سەر وێ یەکێ کر کو سەرۆکوەزیر هەرتم پشتگیریا ئێزدیان کریە و هەولا دابینکرنا مافێن وان دایە.
ل گۆر سه‌عید جردۆ، کەسێن رزگاربووییێن ل شنگالێ دژین، دکارن سەردانا وان بکن و ئالیکاریا دارایی یا حکوومەتا هەرێما کوردستانێ وەربگرن و ژ بۆ ڤێ یەکێ ژی کۆمیتەیەکە تایبەت هاتیە ئاڤاکرن.
هەر د چارچۆڤەیا پشتەڤانیا سەرۆکوەزیر مەسروور بارزانی بۆ ئێزدیان دە، رۆژا 18-07-2024ان، ل سەر راسپاردەیا سەرۆکوەزیرێ هەرێما کوردستانێ، وەزارەتا پەروەردەیا هەرێما کوردستانێ بریار دا، کەسێن کو ژ دەستێ داعشێ رزگار بوونە و د لیستەیا رزگاربوویان دە هاتنە تۆمارکرن و ژ خوەندنێ هاتنە دوورخستن، تەڤاهیا هێسانکاریان ژ وان رە تێن کرن، تا کو جارەکە دن دەست ب خوەندنێ بکن.
