تەڤگەرا ئاڤاکرنا دەمۆکرات کوردستانی – سووریێ (تادەکە-سە)، شەپێلا ئازادیا کوردستانێ (شاک) و پارتیا دەمۆکراتا کورد ل سووریێ (پارتی) د داخویانیەکا ھەڤبەش دە راگھاندن، “د سییا بێدەنگیا ناڤدەولەتی دە، شەوتاندنا دارستانان و بنپێکرنێن مافێن مرۆڤان ب ئاوایەکی رۆژانە ل عەفرینێ تێن کرن.”
تادەکە-سە، شاک و پارتی ئیرۆ 4 تەباخێ داخویانیەکا ھەڤبەش دەربارێ شەوتاندنا دار، چیا و دارستانێن عەفرینێ دە بەلاڤ کرن کو زێدەتر ژ 10 رۆژانە ئاگر پێ کەتیە و ھەتا نھا بەشەکە مەزن ژێ نەھاتیە ڤەمراندن.
د داخویانیێ دە ھات گۆتن: “دار و دارستانێن عەفرینێ ژ چەند سالان ڤە تێن شەوتاندن و برین و رووبەرێن بەرفرەھ ھاتنە وێرانکرن. ژ بەر رەوشا بێسەرووبەر و نەبوونا ئەولەھی و یاسایێ، شەوتاندنا دارستانان و بنپێکرنێن مافێن مرۆڤان ب ئاوایەکی رۆژانە ل عەفرینێ د سیا بێدەنگیا ناڤدەولەتی دە تێن کرن.”
دیار کرن ژی، “د چەند رۆژێن بۆری دە ل ناڤچەیا راجۆ ئاگر ب رووبەرێن بەرفرەھێن دارستانان کەت و زیانەکە مەزن گھیشت ژینگەھێ و خەلکێ رەسەنێ عەفرینێ. ل گۆری ئاماران ژی، 3090 دارێن بەرھەمدار ھاتنە برین و زێدەتر ژ 150 ھێکتار ژ دارستانان شەوتینە.”
ئەو ھەر سێ پارتی دبێژن: “د دەما کو ئەم ھەڤگرتنا خوە ب کەسێن کو د ڤان شەواتان دە زیان دیتنە رە رادگھینن، ئەم بەرپرسیاریێ دخن سەر دەستھلاتدارێن ترکیەیێ، ژ بەر کو ئەو ژ ئەولەکاری و پاراستنا دەڤەرا کو د بن کۆنترۆلا وێ دەیە بەرپرسیارە.”
ھەروھا گۆتن: “خەمساریا دەستھلاتداریا ترکیەیێ و گرۆپێن چەکدارێن سەر ب وێ ڤە و گوھنەدانا وان ب مال و جانێ خەلکێ رەسەنێ ھەرێمێ، رێ ددە بازرگانێن کۆمر و چەکداران کو سوودێ ژ ڤێ رەوشێ ببینن و ئاگر ب قەست و ب بەردەوامی ب چیا، دار و دارستانان بکەڤن.”
تادەکە-سە، شاک و پارتی گۆت ژی، “ئەگەر ترکیەیێ بخوەستا کو ئاگر ڤەمرینە، دێ ب کێمانی ئاموور و تیمێن بەرەڤانیا سڤیل، ژ تیمێن ئاگرکوژیێ و ھەلیکۆپتەر ژ بۆ ڤەمراندنا ئاگر بکار ئانیبانا. لێ بەلکێ گوندیان ب ئاوایەکی خوەبەخش و ب ئالاڤێن ل بەر دەست ھەولا ڤەمراندنا ئاگر دان، ئەگەر نە ژ وان با، دا رووبەرێن بەرفرەھتر شەوتیبانا.”
د بەشەکا دن یا داخویانیێ دە ھات گۆتن: “ئەم ھەر دو پارتی رەدکرنا خوە یا ل سەر ڤەگوھەراندنا ھەرێما عەفرینێ ژ بۆ ھەرێمەکا ڤالا و گوھەرتنا دەمۆگرافیا وێ، دوبارە دکن و ئەم داخواز دکن کو ترکیە وەک ئالیەکی بەرپرس ئەرکێن خوەیێن یاسایی ب جھ بینە، ئارامی و ئەولەھیێ دابین بکە و ژیانا سڤیلان و ژینگەھێ بپارێزە و کار بکە و ھەموو کارێن تێکدانا زەڤیان، برینا داران و ھلکرنا وان راوەستینە.”
ھەروھا وان ھەر سێ پارتیان بانگا ئاڤاکرنا کۆمیتەیەک سەربخوە و بێالی کرن، ژ بۆ ئەشکەرەکرنا بەرپرسێن ڤان شەواتان و رادەستکرنا وان بۆ دادگەھێن دادمەند، تا کو سزایێن ھەری گران یێن یاسایی ل وان بێ برین، لگەل قەرەبووکرنا کەسێن کو زیان دیتنە.
ھەروھا داخواز کرن کو دڤێت گرۆپێن چەکدار ژ ھەرێمێ بێن دەرخستن و رێڤەبەریا ھەرێمێ رادەستی خەلکێ وێ یێ رەسەن بێ کرن، ھەتا کو چارەسەریەکا داوی یا دادمەند ل گۆری بریارا ناڤدەولەتی (2254) و بریارێن دن یێن پێوەندیدار، ژ کریزا سووریەیێ رە تێ جیبجیکرن.
