چەتەیێن ب ناڤێ “جوانێن شۆرەشگەر” کو راستەراست فەرمانا ژ قەندیلێ وەردگرن و ئەرکا وان یا سەرەکە رەڤاندن و چەکدارکرنا زارۆکانە د بەرژەوەندیا پەکەکێ دە کەچەکا 17 سالی ل حەلەبێ رەڤاند.
تۆرا سووری یا چاڤدێریا مافێن مرۆڤان د داخویانیەکێ دە ل سەر مالپەرا خوە راگھاند کو وان رەڤاندنا کەچا تەمەن بچووک “مەریەم ئەدھەم ئیبۆ (17 سالی)” ناڤێ دایکا وێ بێریڤان عەلیکۆ، ژ دەڤەرا شەھبا ل گوندەوارێ حەلەبێ ژ ئالیێ “جوانێن شۆرەشگەر” ڤە تۆمار کریە.
تۆرا سووری یا چاڤدێریا مافێن مرۆڤان هەر وەها دیار کر، مەریەم ئیبۆ، رۆژا ئینێ 2ێ تەباخێ ل بەر دەریێ مالێ و ل پێش چاڤێن دایک و باڤێ خوە ژ ئالیێ “جوانێن شۆرەشگەر”ڤە ھاتیە رەڤاندن و ئەو بەر ب کامپێن چەکدارکرنا زارۆکان یێن گرێدایی ھێزێن سووریا دەمۆکراتیک ڤە بریە.
ھەر وھا تەکەز کر کو ھێزێن سووریا دەمۆکراتیک بنپێکرنێن خوە یێن ل دژی سڤیل و زارۆکان ل ھەرێمێن د بن کۆنترۆلا خوە دە بەردەوام دکە.
زارۆکا بچووک، مەریەم ئیبۆ، ژ گوندێ زەعرە یێ ناڤچەیا بولبولێ یا عەفرینێ ل رۆژئاڤا کوردستانێ یە و تەڤی مالباتا خوە ل ھەرێما شەھبایێ نشتەجھە.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
