نوونەرێ حکوومەتا ھەرێما کوردستانێ ل ئیرانێ راگھاند، ھندەک کەس و ئالیان ھەول دانە کو ھەرێما کوردستانێ ب کوشتنا ئیسماعیل ھەنیە تۆھمەتبار بکن، لێ پلانا وان تێک چوو و راستی دەرکەتن ھۆلێ.
نوونەرێ حکوومەتا ھەرێما کوردستانێ ل ئیرانێ نازم دەباغ د ھەڤپەیڤینا لگەل ئاژانسا “ئیرنا” یا ئیرانی بەحسا کوشتنا سەرۆکێ پۆلیتبورۆیا حەماسێ ئیسماعیل ھەنیە ل تەھرانێ کر.
دەباغ گۆت: “کوشتنا ھەنیە دێ ببە سەدەما ئالۆزیێن زێدەتر د ناڤبەرا وەلاتێن عەرەبی و جیھانا ئیسلامی لگەل رێژیما ئیسرایلێ دە. ھەروھا ھەولدانێن دیپلۆماتیک یێن ل قەتەرێ یێن ژ بۆ راگھاندنا ئاگربەستێ ل غەززەیێ ژی تێک ددە.”
دیار کر ژی: “ھندەک ئالییان ژ بۆ بەردەوامکرنا شەر و پەڤچوونێن ل ھەرێمێ، ھەر تشتێ ژ دەستێ وان تێ، دکن. ژ بەر ڤێ، ھندەکان ھەول دان کو ھەرێما کوردستانێ ژی بێخن ناڤ بوویەرا تەھرانێ و گومانێن شاش بەلاڤ کرن کو ئێریش، چ مووشەک و چ ژی درۆن، ژ ئالیێ ھەرێما کوردستانێ ڤە ھاتیە ئاڤێتن. لێ ئەڤ پلانا وان ب سەر نەکەت.”
سەرۆکێ پۆلیتبورۆیا تەڤگەرا بەرخوەدانا ئیسلامی یا فلستینێ (حەماس) ئیسماعیل ھەنیە رۆژا 31 تیرمەھێ پشتی کو بەشداری مەراسما سووندخوارنێ یا سەرۆکێ نوویێ ئیرانێ مەسعوود پزیشکیان بوو، ل مالا خوەیا ل تەھرانێ ھات کوشتن.
د داخویانیا سێیەما ناڤەندا تێکلیێن گشتی یا سوپایێ پاسدارێن ئیرانێ گۆت: “ل گۆری لێکۆلینان، ئیسرایلێ ب ئاڤێتنا مووشەکەکە کورتاڤێژ ب سەریەکی تەقەمەنییا ب ھێز، ب گرانیا ھەفت کیلۆگرامان ھاتیە کرن.”
سوپایێ پاسدارێن ئیرانێ پشتراست کر کو ئێریش ژ ھوندرێ ئیرانێ ب پشتەڤانیا ئامەریکایێ ھات کرن. ھەروھا گۆت، ئەڤ ئێریش بێ تۆلھلدان نامینە، دڤێت ئیسرایل د وەخت و جھێ گونجایی دە بەردێلێن گران بدە.
