تركیێ ژ 1ی ته‌باخێ ڤه‌ ب ده‌هان بۆمبه‌ و مووشه‌ك ل سه‌ر گوندێن دهۆكێ باراندنه‌

ئارتێشا تركیێ ب سه‌ده‌ما ته‌ڤگه‌را په‌كه‌كێ، ژ 1ی ته‌باخێ ڤه‌ ب ده‌هان بۆمبه‌ و مووشه‌ك ل سه‌ر 10 گوند و هه‌رێمێن دیار یێن پارێزگه‌ها دهۆكێ باراندنه‌، ئێریشان زراره‌ك مه‌زن ل په‌ی خوه‌ هشتیه‌ و شێنیێن ڤان گوندان د نیگه‌رانیه‌كه‌ به‌رده‌وام ده‌ رۆژێن خوه‌ ژیان دكن.

ل گۆری بیلانچۆیا په‌ڤچوونێن په‌كه‌كێ و ئارتێشا تركیێ یێن ژ 1 ته‌باخا ئیسال 2024ێ ڤه‌، 10 گوند، گه‌ل و چیایێن دیار یێن سینۆرێ پارێزگه‌ها دهۆكێ د ئۆپه‌راسیۆنا په‌نجه‌ ده‌ هاتنه‌ بۆردومان كرن، ده‌وله‌تا ترك ئێریش دژوار كرنه‌، هه‌موه‌خت په‌كه‌كێ ژی ته‌ڤگه‌را چه‌كدارێن خوه‌ پێتر نێزی گوندان كریه‌.

گوند و هه‌رێمێن دهۆكێ یێن ژ 1ی ته‌باخێ ڤه‌ كه‌تنه‌ به‌ر ئێریشان

• هنداڤی گوهه‌رزێ.

• دەڤەرا شارا.

• دەریێ بێرا.

• دەرگەلا مووسا بەگێ.

• گەلیێ بازێ.

• گەلیێ دێرەشێ.

• چیایێ حەفتەبەقێ ل هنداڤی گەلیێ شێرانە.

• ئاقارێ گوندێ مژێ.

• گوندێ بلاڤە.

• گوندێ بەرچێ.

ئێریش ووسا بوون:

1/8/2024:

• دەمژمێر ‎7:19‏ مەغرەب بالافرێن ئارتێشا تركیێ تۆنه‌لا هنداڤی گوندێ گوهه‌رزێ و دەڤەرا شارا و دەریێ بێرا ل ناحیا دێرەلۆکێ بۆردومانکرنە.

• ‎دەمژمێر ‎10:05‏ تا ‎10:30‏ شەڤێ دو بالافرێن هەلیکۆپتەر ب چەکێ دۆشکە تەقە ل گوندێ دەرگەلا مووسا بەگێ ل دەڤەرا بەرواری بالا کریە، د هەمان ده‌م دا سێ مووشەک ل گوندی خستنه‌.

• ده‌مژمێر ‎12:20‏ شەڤێ بالافرێن هەلیکۆپتەر ب چەکێ دۆشکێ تەقە ل تۆنه‌لا سەرێ چیایێ هنداڤی گوهه‌رزێ كریه‌.

‎‏ 2/8/2024:

• دەمژمێر ‎5:15‏ ئێڤاری بالافرێن ئارتێشا تركیێ گەلیێ بازێ ل دەڤەرا بەرواری بالا بۆردومانکریە و یه‌ك مووشەک لێخستیه‌.

• دەمژمێر ‎5:18‏ ئێڤاری بالافرێن ئارتێشا تركیێ گەلیێ دێرەشێ ل دەڤەرا بەرێ گارە بۆردۆمانکریە.

• دەمژمێر ‎5:22‏ تا ‎6:18‏ ئێڤاری بالافرێن ئارتێشا تركیێ رۆژهەلاتی تۆنه‌لا هنداڤی گوهه‌رزێ و چیایێ حەفتەبەقێ ل هنداڤی گەلیێ شێرانە ل ناحیا دێرەلۆکێ بۆردومانکریە.

 4/8/2024:

• دەمژمێر ‎5:45‏ و ‎6:17‏ ئێڤاری بالافرێن ئارتێشا تركیێ تۆنه‌لا ل هنداڤی گوهەرزێ بۆردومانکریە ‏ و دو مووشەک لێدانە.

• دەمژمێر ‎8:28‏ شەڤێ تۆپخانه‌یێن ئارتێشا تركیێ ئاقارێ گوندێ مژێ ل دەڤەرا بەرێ گارە تۆپبارانکریە.

• دەمژمێر ‎9:28‏ شەڤێ بالافرێن هەلیکۆپتەر ئێریشا تۆنه‌لا ل هنداڤی گوهەرزێ و پشتا گوند و هه‌ر وه‌ها گوندێن بلاڤە و بەرچێ ل دەڤەرا دەڤەرا نهێلیا ب چەکا دۆشکی كریه‌.

ئارتێشا تركیێ قووناغه‌كه‌ نوو ژ ئۆپه‌راسیۆنا په‌نجه‌ ل دژی په‌كه‌كێ ل باشوورێ كوردستانێ ده‌ستپێكریه‌، رۆژانه‌ گوندێن دهۆكێ د ڤێ ئۆپه‌راسیۆنێ ده‌ تێن بۆردومان كرن، رووبه‌رێن هه‌ری به‌رفه‌ره‌هـ یێن ئاقارێن گوندان شه‌وتینه‌ و زراره‌كه‌ مه‌زن چێبوویه‌، په‌كه‌كه‌ ژی هه‌ر كو دچه‌ پێتر پاشڤه‌ دكشه‌ و نها ته‌ڤگه‌را چه‌كدارێن خوه‌ خستیه دۆربه‌را گوندان، ئه‌و دخوازه‌ گوند ژ شێنییان وه‌رن ڤالا كرن و ببن قادێن شه‌ر.