نەینه‌وایێ 75% یا کرستیانێن خوە ژ دەست دانە، کو هەژمارا وان ل وێ دەڤەرێ ژ بۆ 100 هەزاری کێم بوویە.
رێکخستنا شلۆمۆیێ یا بەلگەنامەیی د راپۆرتەکێ دە ئەشکەرە کریە، «پشتی کو داعشێ نه‌ینه‌وا داگیر کر، 75% یا کرستیانان ژ وی باژاری دەرکەفتنە. ل دووڤ ئاماران، هەژمارا شێنیێن کرستیان د دەما زێدەتری 30 سالان دە ژ 400 هەزار کەسان بۆ 100 هەزار کەسان کێم بوویە».
وێ رێکخستنێ رۆن ژی کریە، «پشتی ئازادکرنا مووسلێ، هەژمارەکە کێم یا شێنیان ڤەگەریان دەڤەرێن خوە، ب ئاوایەکی کو هەتا نها تەنێ 150 مالباتێن کرستیانان ڤەگەریانە».
ئەڤ د دەمەکێ دە یە کو کرستیانێن ئیراقێ د دەما بۆری دە تووشی هەژمارەکە نەخوەشی و ڤەگوهاستن و گەفێن جودا جودا بوون. د دو دەهـ سالێن بۆری یێن ئیراقێ دە ژی، کرستیان ب گڤاشتنێن جودا جودا یێن سیاسی هاتنە دەرێخستن. هەژمارەکە وان بەر ب هەرێما کوردستانێ ڤە کۆچ کریە و لێ ئاکنجی بوونە، هەژمارەکە وان ژی بەرێ خوە دایە دەرڤەیێ وەلاتی. ستەم، شەرێ تاییفی، نەسەقامگریا پارێزگەهێن ناڤەراست و باشوورێ ئیراقێ و کێمیا خزمەتکاریان سەدەمێن سەرەکی یێن کۆچکرنا کرستیانان ژ ئیراقێ بوون.
سەرۆکا رێکخستنا ئازادیا دینی یا ناڤدەولەتی نادنە مائەنزا د داخویانیەکێ دە ژ بۆ مالپەرا دەنگێ ئامەریکایێ راگەهاند، «کرستیانێن ئیراقێ ل ژێر گڤاشتن و هۆڤیتیا ملیشیایان دەنە و د رەوشەکە خراب دە دژین.»
چاڤكانی: كوردستان 24
