هۆشیار زێباری بریارا دەستەیا دادوەری یا کۆمیسیۆنا هلبژارتنان یا ئیراقێ یا دوورخستنا 3 پارتیێن نێزیکی په‌كه‌كێ ژ هلبژارتنێن پارلامەنتۆیا کوردستانێ، ب کارەکی راست و ژیرانە بناڤ کر و گۆت، ئەو هەر سێ پارتی فاکتۆرێن نەئارامی و تەڤلهەڤیێ نە.
ئەندامێ دەستەیا کارگێری یا پۆلیتبورۆیا پارتیا دەمۆکراتا کوردستانێ (په‌ده‌كێ) هۆشیار زێباری ل سەر تۆرا جڤاکی «X» نڤیسی: «بریارا دەستەیا دادوەری یا کۆمیسیۆنا بلندا سەربخوە یا هەلبژارتنان ژ بۆ قه‌ده‌غەکرنا سێ پارتیێن کوردی یێن سەر ب په‌كه‌كێ ڤە د هلبژارتنێن پارلامەنتۆیا کوردستانێ دە، راست و ژیرانەیە، ژ بەر کو ئەو بوونە شانەیەکە پەنجەشێرێ ل هەرێما کوردستانێ و ئیراقێ و ئەو فاکتۆرا نەئارامی و تەڤلهەڤیێ نە».
دەستەیا دادوەری یا هلبژارتنانا ئیراقێ دەستپێکا ڤێ مەهێ دە، بریارا هلوەشاندنا 3 پارتیێن سیاسی دەرخست، کو تێ گۆتن گرێدایی پارتیا کارکەرێن کوردستانێ نە کو ل ئیراقێ قه‌ده‌غەیە.
ل سەر داخوازا ئۆفیسا کاروبارێن پارتی و رێخستنێن سیاسی، دەستەیا دادوەری یا هلبژارتنان dا ئیراقێ بریار دا کو پارتیێن (ئازادیا دەمۆکراتیکا ئێزدیان، بەرەیا تێکۆشینا دەمۆکراتیک و تەڤگەرا ئازادی) بێن هلوەشاندن، ناڤەندێن وان بێن گرتن و مال و ملکێن وان بێن دەستەسەرکرن.
ئەڤ داخواز، ل سەر گلیا شێورمەندێ ئاسایشا نشتیمانی یا ئیراقێ بوویە، ژ بەر چالاکیێن وان پارتیێن سەر ب په‌كه‌كێ یا قه‌ده‌غەکری ل ئیراقێ هاتیە کرن.
د بریارا دەستەیا دادوەری یا هلبژارتنان دە هات گۆتن، پشتی لێکۆلینا ئۆفیسا کاروبارێن پارتی و رێکخستنێن سیاسی و زانیاریێن دەزگەها ئیستخباراتا ئیراقێ، هات پشتراستکرن کو پێوەندییا وان ئالیان ب په‌كه‌كێ رە هەنە.
