سەرۆکێ تۆرا مێشڤانێن کوردستانێ ئاشکەرا کر ژ بەر چەند سەدەمان، ئەگەر ھەیە بەرھەمێ ئیسال یێ ھنگڤینێ ھەرێما کوردستانێ ب رێژەیا سەدی 90 کێم ببە.
سەرۆکێ تۆرا مێشڤانێن کوردستانێ عارف شێروانی راگەھاند، ئیسال بەرھەمێ ھنگڤینی پر کێمە، ئەو ژی ژ بەر چەند سەدەمانە و “یەک ژ وان ژی ئیسال دەڤەرا برادۆست ژ بەر کو تەنێ تێرا مێشێن وان بخوە دکر وان نەھشتن ژ ت پارێزگەھەک دن مێش بچن زۆزانێن وان، تەنێ هشتن مێشێن ئیدارەیا سەربخوەیا سۆرانێ بچن دەڤەرێ.”
ھەروەھا دیار کر ژ ئالیێ دن ڤە سەدەمەکی دن یی کێمبوونا بەرھەمێ ھنگڤینێ ئیسال ئەو بوو، ژ بەر زۆزان ئیسال گەلەک ساربوون و راگەھاند: “نھا زۆزان پر سارن و ئەم ل زۆزانان ژیان دکن. سالێن بۆری د وان دەمان دە مە ئاموورێن ھێنیک کرنێ بکارتانین، لێ ئیسال ھەتا نھا ژی مە ئەو ئاموور بکار نەئانینە.”
سەرۆکێ تۆرا مێشڤانێن کوردستانێ دیار کر، سەدەمەکی دن یێ کێمبوونا بەرھەمێ ھنگڤین ژی “شەرێ ترکیێ و پەکەکێ گەلەک باندۆر کریە. ئەو جیھێن کو چیانە، ب تایبەت ل سینۆرێ پارێزگەھا دھۆکێ، کەتنە ناڤ شەرێ ترکیێ و پەککەێ و ل ناڤچەیێ شەر ھەیە. ژ بەر وێ ژی مێشڤان ژی نکارن مێشێن خوە ژ بۆ وان سینۆران ڤەگوھێزن، ژ بەر کو یان پەکەکە ل دەڤەرێیە، یان ژی ترکیە تۆپباران دکە و ئەو ژی گەلەک باندۆرێ ل سەر بەرھەمانینا ھنگڤینی دکە.”
عارف شێروانی کو ئەو بخوە ژی مێشڤانە، د وێ باوەریێ دەیە کو ل گۆر سالێن بۆری بەرھەمێ ھنگڤینێ ئیسال دێ ب رێژەیا سەدی 90 کێم ببە. ب تایبەت ژی کو دەردۆرا 10 رۆژان مایە ژ بۆ برینا مێشان و وەرگرتنا ھنگڤینی دێ رێژە پر کێم ببە. بەرھەمێ نھا ھەی ژی یێ دەشتێ یە، لێ بەرھەمێ ھنگڤینێ زۆزانان گەلەک کێمە.”
شەرێ پەکەکێ و ترکیێ ژ دەرڤەی بەرھەمێ ھنگڤینی باندۆرێن جودا و خراب ل سەر گەلەک ئالیێن ژیانێ دکە، ب تایبەت ل وان جیھێن سینۆری کو شەر د ناڤبەرا ھەردو ئالیان دە پێکتێ، ژینگەیا ناڤچەیێ ژی وێران بوویە و دارستانێن خوەزایی ژ بەر وی شەری شەوتینە و ت کەس ژی نکارە ب ئارمانجا گەشتیاریێ ژی سەردانا وان ناڤچەیان بکە.
