تەڤی کو دەستەیا دادوەرییا ھلبژارتنان یا ئەنجوومەنا بلندا دادوەریا ئیراقێ بریارا گرتنا 3 پارتیێن نێزیکی پەکەکێ دایە، لێ ئەو بریار ل سلێمانیێ نەھاتیە جیبجیکرن.
ل سەر داخوازا ئۆفیسا کارووبارێن پارتی و رێخستنێن سیاسی، دەستەیا دادوەری یا ھلبژارتنان یا ئیراقێ بریار دا کو پارتیێن (ئازادیا دەمۆکراتیکا ئێزدیان، بەرەیا تێکۆشینا دەمۆکراتیک و تەڤگەرا ئازادی) بێن ھلوەشاندن، ناڤەندێن وان بێن گرتن و مال و ملکێن وان بێن دەستەسەرکرن.
ئەڤ داخواز، ل سەر سکالایا شێورمەندێ ئاسایشا نشتمانی یا ئیراقێ بوویە، ژ بەر چالاکیێن وان پارتیێن سەر ب پەکەکێ یا قەدەغەکری ل ئیراقێ ھاتیە کرن.
چاڤدێرێ سیاسی زانا تەوفیق بەگ د وێ باوەریێ دەیە، پرسگرێک ئەوە کو پرانیا بارەگەھێن وان ھەر سێ پارتیان ل سلێمانیێ نە، نە پێکانە کو ئەڤ بریار ب ھێسانی ل سلێمانیێ بهێت جیبجیکرن.
زانا تەوفیق گۆت: “مخابن ئەو ھەر سێ پارتیێن سەر ب پەکەکێ ڤە ل سلێمانیێ چالاکن و ھەتا نھا رایەدارێن باژێر نەکارینە بارەگەھێن وان بگرن، یان ژی کۆنترۆل بکن.
ژ بەر کو پەکەکە ھەری زێدە ل پارێزگەھا سلێمانیێ سەردەست و چالاک بوویە، چاڤدێر د وێ باوەریێ دە نە کو دڤێت ئەڤ بریارە وەرە جیبجیکرن، ئەگەر نا، دێ رایەدارێن وێ پارێزگەھێ بخە ژێر بەرپرسیاریێ.
