ل ناڤچەیا ئەسەنیورتێ یا ستەنبۆلێ، پۆلیسان ئێریشی داوەتەکا کوردان کرن و ژ ھەمان مالباتێ پێنج کەس بنچاڤ کرن.
رێخستنا ئەسەنیورتێ یا دەم پارتیێ دا خویاکرن، شەڤا بۆری پۆلیسێن سڤیل و فەرمی ب چەندین ئۆتۆمۆبێلان ئێریش برنە سەر داوەتەکا کوردان ل ئەسەنیورتێ و پۆلیسان 5 کەس ژ مالباتا کارچک بنچاڤ کرنە.
دەم پارتی رەخنە ل ھەلوەستا پۆلیسێن ترکیەیێ دگرە و دبێژە، مالباتا کارچک ل ئەسەنیورتێ د کۆلانا خوە دە ئاھەنگا داوەتێ دکر، لێ راستی ئێرشێ پۆلیسان ھات. ئەڤ یەک ژی ئاستا نێزیکاتیا ھەمبەری کورد، کوردی و داوەتێن کوردان نیشان ددە.
دەربارێ ڤێ بوویەرێ دە، چ داخویانی ژ ئالیێ وەزارەتا ناڤخوە یا ترکیەیێ و رایەدارێن دن ڤە، نەھاتیە دایین.
پێشتر ژی ل چەند باژاران، گەلەک کەس ب ھنجەتا کو ل بەر موزیکا کوردی گۆڤەند گەراندنە ھاتبوون بنچاڤکرن.
کەسێن کو ھاتنە بنچاڤکرن، ب “پرۆپاگاندایا رێخستنا تەرۆرێ” تێن تۆمەتبارکرن.
