وەزیرێ بەرەڤانیێ یێ ترکیێ یاشار گولەر گۆت، هەتا دەستوورەکە نوو نەیێ نڤیساندن و هلبژارتن چێنەبن، ئارتێشا وی ژ سووریێ ڤەناکشە.
گولەر ژ ئاژانسا «رۆیته‌رزێ» رە راگهاند، «تەنێ پشتی کو دەستوور نوو هات قەبوولکرن، هلبژارتن هاتن کرن و ئەولەهیا سینۆران هات پەیداکرن، ئەم دکارن ل سەر ڤکشینا ژ سووریەیێ بئاخڤن».
گولەر گۆت ژی: «چ ل مۆسکۆ یان ژی ل دەڤەرەکە دن، دبە کو جڤینەکە دوئالی یا ل سەر ئاستا وەزیران ب سووریێ رە وەرە کرن».
داخویانیێن گولەر پشتی وێ تێ، دەمەکە بەحسا ئاساییکرنا پەیوەندیێن د ناڤبەرا ترکیە و سووریەیێ دە و هەڤدیتنێن سەرۆکێن هەر دو وەلاتان تێ کرن و رووسیا ژی ئاکتۆرێ سەرەکە یا ڤێ ئاساییکرنێ یە.
د ڤێ دەربارێ دە، سەرۆکێ سووریەیێ بەشار ئەسەد بێهتری جارەکێ راگهاندبوو، ڤەکشینا ترکیێ ژ ئاخا سووریەیێ، مەرجێ ئاساییکرنا پێوەندیێن د ناڤبەرا ئەنقەرە و شامێ دە یە.
ئەنقەرەیێ پشتی شەرێ ل سووریەیێ د سالا 2011ان دە، پێوەندیێن خوە ب شامێ رە قوت کرن و پشتگری دا ئۆپۆزیسیۆنا رەژیما ئەسەد و پێشوازی ل ئۆپۆزیسیۆن و کۆچبەرێن وی وەلاتی کربوو.
د بەرچلەیا سالا 2022ان دە ژی، رووسیایێ پشتی 11 سالان، مێڤانداریا یەکەم هەڤدیتنێن د ناڤبەرا ترکیە و سووریێ دە ل سەر ئاستا وەزیرێن بەرەڤانیێ کربوو.
