ئەڤە ھەفتیەکە کو رەوشا ئەولەھیێ ل سنۆرێ دێرازۆرێ، ژ بەر شەرێ چەکدارێن عەشیرەتێن عەرەبان یێن وێ دەڤەرێ، ب پشتەڤانیا رژێما سووریەیێ لگەل ھێزێن سووریەیا دەمۆکرات (ھەسەدێ) بەردەوامە و ھەڤپەیمانیا ناڤدەولەتی ژی بنگەھێن خوە بھێز دکە.
رەوانگەھا سووریەیی یا مافێن مرۆڤان ئیرۆ (سێشەم، 13/8/2024) پارڤە کریە، “ل گەل بەردەوامیا شەر و ئالۆزیێن دێرازۆرێ، شێورمەندێن سەربازی یێن ھەڤپەیمانیا ناڤدەولەتی ل ھەر دو ئالیێن رووبارێ فراتی مژوولی مەشق و راھێنانانن، ژ بەر ترسا بەرفرەھبوونا شەری، ھێزەکا زێدەتر ب کەلووپەلێن لۆجستی ڤەگوھاستیە بنگەھا کۆنیکۆیێ یا باکورێ رۆژھلاتا سووریەیێ کو دکەڤە سنۆرێ پارێزگەھا دێرازۆرێ.”
ل گۆر ئامارێن رەوانگەھێ، ھەتا نھا ژ بەر شەری 40 کەس ھاتنە کوشتن و 50 کەسێن دن ژی بریندار بوونە. د ناڤ قوربانیان دە ژی، ھەژمارەکا خەلکێ سڤیل ھەیە کو بوونە قوربانیێن گولەیان.
جڤاتا سووریەیا دەمۆکرات ل سەر شەر و ئالۆزیان راگەھاندنەک پارڤە کریە و رەد دکە کو ژ بۆ یەکالیکرنا دوبەرەکیێن ئامەریکا و ئیرانێ ل سەر ئاخا سووریەیێ بچن ناڤ شەرەکی.
ھەروەسا راگەھاندیە، “رژێما سووریەیێ کەفتیە بن باندۆرا پلانا ھەرێمی، لەوما ژی زمانێ گەفان ژ دەستھلاتدارێن دیمەشقێ قەبوول ناکن.”
ھایداری ژی دایە کو، “ئێریشێن حکوومەتا سووریەیێ و چەکدارێن عەشیرەتێن عەرەبێن دێرازۆرێ دێ باندۆرەکا نەرێنی ل سەر رەوشا دەڤەرێ ھەبە، ب تایبەتی دبە سەدەما زێدەتربوونا ئێریشێن ترکیەیێ و چالاکبوونا چەکدارێن داعشێ. ڤێ یەکێ باندۆر کریە سەر رەوشا ئەولەھیا قامشلۆیێ و د چارگۆشەیا ئەولەھیێ دە ئالۆزی کەفتیە ناڤبەرا ھێزێن رژێما سووریەیێ و ھەسەدێ، لێ رووسیا بزاڤێ ژ بۆ ناڤبەینکاری و تەناکرنا رەوشێ دکە.”
شاندا رووسیایێ ل قامشلۆ و حەسەکەیێ لگەل بەرپرسێن حکوومەتا سووریەیێ و ھەسەدێ جڤیا، لێ دانووستاندن بێ ئەنجام بداوی ھاتن، لەوما ژی ژ بۆ کو رەوش زێدەتر ژ دەستان دەرنەکەڤە، رووسیایێ د چارگۆشەیا ئەولەھیێ یا قامشلۆیێ دە بنگەھەکێ سەربازی د ناڤبەرا ھەسەدێ و حکوومەتا سووریەیێ دە دانایە.
