هن ژ شێنیێن گوندێن دەردۆرا ئامێدیێ یێن کو ژ بەر شەرێ سەختە یێ د نێڤبەرا چەکدارێن پەکەکێ و لەشکەرێ ترکیەیێ زەرەر ب وان گهشتنە، ژ ئالیێ حکوومەتا هەرێما کوردستانێ ڤە هاتن قەرەبووکرن.
ئیرۆ رۆژا سێشەمی 13/8/2024ان، 103 کەس ژ شێنیێن گوندێن “بەرچێ، بەلاڤە، سەرگەلێ و گوهەرزێ” یێن دەڤەرا نهێلێ کو ژ بەر شەرێ سەختە یێ د ناڤبەرا چەکدارێن پەکەکێ و لەشکەرێ ترکیەیێ زەرەرمەند بوونە هاتن قەرەبووکرن.
د مەراسیما قەرەبووکرنێ دە، پارێزگارێ دهۆکێ دکتۆر عەلی تەتەر راگهاند، بێی واتەترین شەرێ د دیرۆکا کوردستانێ دە روو دایی ئەڤ شەرە کو نە شەرێ مەیە و نەژی ئەم فێم دکن چما ئەڤ شەر ل دەڤەرا مە تێ کرن.
عەلی تەتەر هەر وەها گۆت، ئازادیا پشتی سەرهلدانا سالا 1991 گەلێ باشوور ب خوینا دەهان هەزار کەسان ب دەست خستی، مخابن ئیرۆ هن ژ هێزێن چەکدار “پەکەکێ” نەهشت ب تایبەت گەلێ دەڤەرا ئامێدیێ وەکە پێویست خوەشیێ پێ ببینە.
هەر وەها تەکەز کر، راستە ئەم ب ناڤێ قەرەبووکرنا زەرەرمەندێن شەر ل ڤرن، ئەم ت منەتەکی ب گەلێ خوە ناکن، لێ زەرەرا کو ب مە گهشتی ب پەرە نایێ قەرەبووکرن، مە پر جاران گۆتیە، ئەم جارەکە دن ژی دبێژن، هەیانی ئەڤ چەکدارە ل هەرێمێن مە دەرنەکەڤن ئەم نایێن قەرەبووکرن، هەیا کو ئەڤ شەرێ نەرەوا، ئەڤ شەرێ بێ واتە ژ دەڤەرا مە نەیێ دوور کرن، قەرەبوویا مە نایێ کرن.
تێ زانین کو ئارتێشا ترکیێ رۆژا 18ێ نیسانا 2022 ل ناڤچەیێن زاپ، ئاڤاشین و مەتینا یێن د ناڤ ئاخا باشوورێ کوردستانێ دە ل دژی په‌كه‌كێ دەست ب ئۆپەراسیۆنا ب ناڤێ پەنجە-کلیت کریە و ئۆپەراسیۆن هەتا نها بەردەوامە، ژ بەر ڤێ ئۆپەراسیۆنێ ژی هەژمارەک هەری زێدە ژ شێنیێن گوندێن دەردۆرا ئامێدیێ، ب تایبەت گوندێن دەڤەرا نهێلێ راستی زرارێن مەزن هاتنە.
ئۆپەراسیۆنا «پەنجە-کلیت»، ناڤچەیێن مەتینا، زاپ و ئاڤاشین-باسیانێ یێن د ناڤ ئاخا هەرێما کوردستانێ دە ل خوە دگرە.
