وەزارەتا پێشمەرگە یا ھەرێما کوردستانێ و شێورمەندێن لەشکەری یێن ھەڤپەیمانان دانوستاندنان ل سەر پێشکێشکرنا ئالیکاریێن مەھانە بۆ پێشمەرگەیێن لیوایا 9 و لیوایا نوو یا پیادە و فەوجێن دن کر.
شاندا وەزارەتا پێشمەرگە ب سەرۆکاتیا وەزیرێ پێشمەرگە شۆرەش ئیسماعیل لگەل بەرپرسێ نوو یێ تیما شێورمەندیا لەشکەری یا ھەڤپەیمانیا ناڤنەتەوەیی ل ھەرێما کوردستانێ و بەرپرسێ ئۆفیسا ھەڤاھەنگیا ئاساییشێ ل کۆنسولخانەیا ئامەریکا ل ھەولێرێ جڤیا.
ل گۆری داخویانیا وەزارەتا پێشمەرگە، د ھەڤدیتنێ دە چەندین مژارێن گرینگێن گرێدایی پرۆسەیا چاکسازیێ ل وەزارەتا پێشمەرگە و رێکخستن و یەکخستنا ھێزێن پێشمەرگەیێن کوردستانێ، ب ھەڤکاری و پشتەڤانیا ھەڤپەیمانان ھاتن گۆتووبێژکرن.
ھەر وھا بەحسا پێکانینا دو فرقەیان ژی ھات کرن کو ھەول ژ بۆ پێکانینا فرقەیێن زێدەتر و بلەزکرنا وێ پرۆسەیێ د چارچۆڤەیا وەزارەتا پێشمەرگە دە بەردەوامن.
دەربارێ پرسگرێکا لیوایا نەھا پیادە و ئەو فرقەیێن دن یێن کو ژ ئالیکاریێن مەھانەیێن ھەڤپەیمانیێ بێپار مانە، وەزیرێ پێشمەرگە داخواز ژ ھەڤپەیمانان کر کو د چارەسەرکرنا کێشەیان دە ئالیکار بن، دا کو د مەھێن بێ دە سوودێ ژ ئالیکاریێن مەھانەیێن ھەڤپەیمانان وەربگرن.
