ل عەفرینێ تەقینەک چێ بوو، کوشتی و بریندار ھەنە

 ل باژارێ عەفرینێ یێ رۆژئاڤایێ کوردستانێ تەقینەک د ھوندرێ ترومبێلەکێ دە چێ بوو، کوشتی و بریندار ھەنە.

سەرێ ڤێ سبەھێ (چارشەمبێ، 14/8/2024) ل نێزی رێیا راجۆیێ، ل بەرانبەری خوارنگەھا گەبسۆیێ ل عەفرینێ، تەقینەک د ھوندرێ ترومبێلەکێ دە چێ بوو.

ھات زانین کو کوشتی و بریندار ھەنە لێ ھەتا بەرھەڤکرنا ڤێ نووچەیێ ژی، زرارێن جانی و مادی ب ئاوایەکی فەرمی نەھاتنە راگەھاندن.

د دەربارا کوشتی و برینداران دە چ ئاگاھیێن پشتراستکری نەھاتنە بدەستخستن. ھەروەسا ھەتا نھا چ ئالیان ژی بەرپرسیاریا خوە ل سەر وێ روودانێ دیار نەکریە.

عەفرین یەک ژ باژارێن رۆژئاڤایێ کوردستانێیە، ل سالا 2018 ژ ئالیێ ترکیەیێ ڤە ھات داگیرکرن و ژ ھنگێ ڤە گەلەک روودانێن جودا جودا ل وێ دەرێ دقەومن.