هێزێن ئاساییشا په‌یه‌دێ یێن ل باژارۆکێ عاموودێ، پشتی 2 رۆژان ژ رەڤاندنا کەچا ب ناڤێ شێخا تەتەر، ئیرۆ 4 ئەندامێن مالباتا وێ و پسمامەکی وێ گرتن.
تۆرا چاڤدێریا مافێن مرۆڤان یا سووریەیێ بەلاڤ کر، هێزێن ئاسایشێ یێن سەر ب په‌یه‌دێ ڤە، رۆژا 11ێ تەباخێ ب سەر مالا کەچکا ب ناڤێ شێخا تەته‌ر یا ل باژارۆکێ عاموودێ گرتبوون، ل ئەندامێن مالباتێ دان و پشترە شێخە بەر ب جهەکی نە دیار ڤە رەڤاندن.
وێ تۆرێ دیار کر ژی، هێزێن ئاسایشێ ئیرۆ 14ێ تەباخێ جارەکە دن ب سەر مالا کەچکێ دە گرت و جارەکە دن ل ئەندامێن مالباتێ دان و پشترە باڤ (عەبدولباری)، داییك (فاتیمە)، دو برا (دژوار و هەژار) و پسمامێ کەچکێ (شیان) گرتن.
تۆرا چاڤدێریا مافێن مرۆڤان تەکەز دکە، هین ژی باسکێن ئەولەکاریێ یێن هه‌سه‌دێ د بنپێکرنا یاسایێن ناڤدەولەتی دە، ب تایبەتی بریارێن (2139 و 2254) بەردەوامن و پابەندی وان نابە، کو ب ئاوایەکی بێسەرووبەر، بێ هشیاریا پێشوەخت و ب هنجەتێن دەرەو، سڤیلان دگرن.
تۆرا چاڤدێریا مافێن مرۆڤ مەترسیا خوە دەربارێ چارەنڤیسا مالباتا عەبدولباری تەتەر نیشان دا و گۆت، دبە کو ئەو راستی ئەشکەنجەیا لاشی و ونداکرنا ب زۆرێ بێن.
هەروها تۆرێ بانگ ل جڤاکا ناڤدەولەتی و هەڤپەیمانیا ناڤدەولەتی یا ب سەرۆکاتیا ئامەریکایێ کر کو بەرپرسیاریێن خوە ل هەمبەر سڤیلان رابن و وان بپارێزن، فشارێ ل هه‌سه‌دێ و شاخێن وێ یێن ئەولەکاری بکن، ژ بۆ راوەستاندنا بنپێکرنێن ل دژی سڤیلان و چارەنڤیسا کەچکا رەڤاندی و مالباتا وێ ئەشکەرە بکە و بەرپرسان ڤێ بوویەرێ دەرخینە پێشبەری دادگەهێ.
