تەڤگەرا جوانێن شۆرەشگەر کو باسکەکی سەر ب پەکەکێ یە ل رۆژئاڤایێ کوردستناێ، 3 زارۆک ب ئارمانجا بچەککرنا وان ژ تاخا شێخ مەقسوود یا حەلەبێ رەڤاندن، کو 2 ژ وان خوشک و برا نە.
ژێدەرەکی ئاگاھدار ژ K24 رە راگەھاندیە، تەڤگەرا جوانێن شۆرەشگەر جوانا 19 سالی یا ب ناڤێ حەنیفا حەمۆ مسلم ژ 1 گولانێ ڤە و برایێ وێ یێ 12 سالی حەمید حەمۆ مسلم ل تاخا شێخ مەقسوود رەڤاندن.
ل گۆری ھەمان ژێدەرێ، زارۆکێن رەڤاندی خەلکێ ناڤچەیا جندرێسێ یا عەفرینێ نە و ژ سالا 2019 ڤە لگەل مالباتا خوە کۆچبەری حەلەبێ بوونە.
وی ژێدەری دیار کر ژی، ھەمان تەڤگەرێ زارۆکێ ب ناڤێ محەمەد مستەفا سیدۆ یێ 15 سالی ژی ژ تاخا شێخ مەقسوود رەڤاندیە.
ژ دەما رەڤاندنێ و ھەیا نھا مالباتا ھەردو زارۆکان چ زانیاریان دەربارێ وان نزانن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن، تا کو چارەنڤیسا زارۆکێن وان دیار بکن.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکاران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان ب داوی نەبوویە.
تاخا شێخ مەقسوودا حەلەبێ، وەک تاخا کوردان تێ ناسین و ب ھەزاران کورد و ب تایبەتێن عەفرینێ لێ دژین. ئەو تاخ د دەستێ یەپەگێ/ھەسەدێ دەیە و رێڤەبەریا خوەسەر ژی لێ ھاتیە راگھاندن.
