کۆڤارا فۆربس ب گرنگی بەحسا هەولێن ئامەریکایێ ژ بۆ بچەککرنا هێزێن پێشمەرگەیێن کوردستانێ دکە.
کۆڤارا فۆربس راگهاند، ئامەریکا بێیی کو ڤەگەرە بەغدایێ هێزێن پێشمەرگە بچەک دکە. هەروها گۆت، ژ بلی تۆپخانەیێن دوورئاڤێژ، چەند جورەیێن چەک و ئۆتۆمبیلێن ڤەگوهەستنا لەشکەری یێن تایبەت، ئامەریکا درۆنان ژی ددە هێزێن پێشمەرگە.
کۆڤارێ ئاماژە ب هەڤپەیڤینا سەرۆکوەزیر مەسروور بارزانی یا د مەها سباتێ دە ل سەر کانالا «NBC» کر و تەکەز ژی کر، هەرێما کوردستانێ ژ بۆ پاراستنا خوە، پێویستیا هێزێن پێشمەرگە ب چەکێن پێشکەفتی هەیە.
بەردەڤکێ هەرێمی یێ وەزارەتا دەرڤە یا ئامەریکایێ ساموێل واربەرگ رۆژا 8ێ تەباخێ ژ ک24ێ رە گۆت: «ئەم د چارچۆڤەیا هەولێن هەڤپەیمانیا ناڤدەولەتی یا ل دژی داعشێ دە ژ بۆ رووبرووبوونا مەترسیا داعشێ، کار ژ بۆ بلندکرنا هەڤکاریێ ل گەل هێزێن پێشمەرگە دکن».
ژ کۆما زێدەتر ژ 180 هەزار پێشمەرگەیێن گرێدایی وەزارەتا پێشمەرگە؛ 44 هەزار ژ وان د چارچۆڤەیا 15 لیوایێن هەڤبەش دە، د بن سیوانا وەزارەتا پێشمەرگە دە هاتنە برێکخستن. ئامەریکا ژی مەهانە نێزیکی 25 ملیۆن دۆلار (25 ملیار دینار) ژ بۆ مووچەیێن 44 هەزار پێشمەرگە خەرج دکە.
