ئەنداما پارلامەنتۆیا ئیراقێ یا بەرێ یا سەر ب په‌ده‌كێ ڤه رەخنەیێن توند ل یه‌نه‌كێ دکە، ژ بەر وێ رێكکەفتنا ل گەل عه‌ره‌بێن کەرکووکێ کرنە و رادگەهینە کو یه‌نه‌كێ سازش ل سەر مافێن کوردان و کوردستانیبوونا کەرکووکێ کریە.
ئەنداما بەرێ یا پارلامەنتۆیا ئیراقێ و شاره‌زایا یاسایا دەستووری نەدا مێرگەسۆری ژ باسنیوزێ رە راگەهاند، هێڤیا مە ئەو بوو پشتی هەلبژارتنێن ئەنجوومەنا پارێزگەهێن ئیراقێ رەوشا کەرکووکێ ب گشتی و ژ بۆ کوردان ژی ب تایبەتی بەر ب باشی و ئارامیێ ڤە بچە، لێ مخابن «خویا دکە رەوشا کەرکووکێ ژ بۆ کوردان بەر ب باشیێ ڤە ناچە، ب تایبەت ژی پشتی دەستنیشانکرنا پارێزگارەکی نوو ژ بۆ کەرکووکێ ب ئاوایەکی نەیاسایی و ب رێکكەفتنا یه‌نه‌كێ ل گەل هن ئالیێن عه‌ره‌بی و ژ دەست دانا پەیورێن هەری گرنگ و هەستیار و دایینا وان ب عه‌ره‌بان رە رەوش باش نابە».
هەروه‌ها گۆت: «یه‌نه‌كه دخوازە کەرکووک و خەلکێ کوردێ وی باژاری بکە قوربانا رێکكەفتنەکە عەجێب، ئەگەر نا چ هونەر تێدەیە کو هەموو پەیور و هەموو پێگەهێن هەستیارێن هه‌ماهه‌نگی و ئەولەهیێ تو بدی پێکهاتەیا عه‌ره‌ب. و ل هەمبەر وێ ژی تەنێ سالەک و چار مەهان پۆستا پارێزگار وەربگری؟ خوەزی مژار تەنێ دایینا ئه‌ركان بە، لێ وایە گەلەک کەسێن وەک قەیس خەزعەلی کو خوەدیێ بافل تالەبانی یە، هەروه‌ها وەسفی ئاسی کو پارلامەنتەرەکی عه‌ره‌بە، ل گەل موهەیمەن حەمدانی و رەعید سالحی یێ ئەندامێ ئەنجوومەنا پارێزگەها کەرکووکێ یێ کوتلەیا عه‌ره‌بییە، هەموو ب ئاشکەرا دبێژن کو یه‌نه‌كێ سازش ل سەر کوردستانیبوونا کەرکووکێ کریە و گۆتیە کەرکووک باژارەکی ئیراقی یە و رازیبوویە ئالا کوردستانێ ل کەرکووکێ نەیێ راکرن و گۆتیە، پێشمەرگە و ئاساییش ڤەناگەرن کەرکووکێ، ب جددی رێكکەفتنەکە وه‌ها بێ کرن ئەو چ رێکەفتنە»؟
مێرگەسۆری راگەهاند: «یه‌نه‌كه، وه‌ها رەفتار بکە، کەرکووک ب تەمامی د بن دەستێ کوردان دێ بێ دەرخستن و کوردستانیبوونا کەرکووکێ ژی د پاشەرۆژێ دە مەترسیێن جددی دکەڤن سەر. هەرچەند کوردستانیبوونا کەرکووکێ خوەدی بنگەهەکی کەڤنێ دیرۆکییە و هەزار پارتی ژ درووشمێن خوە ڤەگەریابن و ببێژن کەرکووک نە کوردستانییە، لێ هین کەرکووک کوردستانییە و دێ هەر ب کوردستانی ژی بمینە».
دەربارێ رێکكەفتنا دانینا پارێزگارێ کەرکووکێ دە ژی گۆت: «دوهـ خیانەتا 16ێ جۆتمەهێ بوو، ڤێ جارێ ژی رێکكەفتنا دانینا پارێزگار! یه‌نه‌كه وه‌ها رەفتار بکە و کەرکووک و خەلکێ وێ یێ رەسەن بکە قوربانا ئارمانجێن خوەیێن تەنگێن پارتیێ، د پاشەرۆژێ دە خوەدێ نەکە دڤێ فاتیحە بۆ کەرکووکێ بێ خواندن».
چاڤكانی: باسنیوز
