بالیۆزخانەیا فرانسا ل بەغدایێ دبێژە، فرانسا ژ بۆ پشتگریا چەند پرۆژەیێن چاکسازیێ یێن وەزارەتا پێشمەرگە، دێ شێورمەندێن خوە بشینە کوردستانێ.
وەزارەتا پێشمەرگە د داخویانیەکێ دە بەلاڤ کر، «رێڤەبرێ چاکسازیێ یێ وەزارەتا پێشمەرگە لیوایێ ئەندەزیار نەبەز سەلاح سدیق ل هەولێرێ ل گەل رێڤەبەرێ کاروبارێن لەشکەری و سڤیلێن بالیۆزخانەیا فرانسا ل بەغدایێ گەنەرال ئۆلیڤەر سەلۆ و سەرۆکێ تیما فرانسایێ د هەڤپەیمانیا ناڤدەولەتی یا ل دژی داعشێ دە ل هەرێما کوردستانێ کۆلۆنێل جۆن مارک جڤیا».
ل گۆری داخویانیا وەزارەتێ، د هەڤدیتنێ دە رێڤەبەرێ چاکسازیێ یێ وەزارەتا پێشمەرگە کورتەیەک دەربارێ هەولێن وەزارەتا پێشمەرگە بۆ یەکگرتن و برێخستنکرنا هێزێن پێشمەرگە د چارچۆڤەیا چەند پرۆژەیان دە پێشکێش کر.
ژ ئالیێ خوە ڤە، گەنەرال ئۆلیڤەر سەلۆ ئامادەبوونا فرانسا ژ بۆ پشتەڤانیا پرۆسەیا چاکسازیا وەزارەتا پێشمەرگە نیشان دا. هەروه‌ها تەکەزی ل سەر گرنگیا تەڤلیبوونا وەلاتی ناڤا کۆما پرنەتەوەیی یا شێورمەندیا لەشکەری یا هەڤپەیمانان کر.
هەروه‌ها گۆت ژی: د پاشەرۆژێ دە، فرانسا دێ وەک وەلاتێن دن یێن هەڤپەیمان، دێ شێورمەندێن خوە بۆ پشتەڤانیکرنا چەند پرۆژەیێن بەرنامەیا چاکسازیێ یا وەزارەتا پێشمەرگە بشینە.
