فەرماندارێ ھێزێن ئامەریکی ل ئیراقێ دبێژە، ھێزێن ھەڤپەیمانیا ناڤدەولەتی دێ ل سەر پشتەڤانیا ھێزێن پێشمەرگە بەردەوام بن.
وەزارەتا پێشمەرگە د داخویانیەکێ دە راگھاند، فەرماندارێ ھێزا پشتەڤانیێ یەک، فەریق سیھاد بارزانی پێشوازی ل فەرماندارێ گشتی یێ شێورمەندێن لەشکەری یێن ھەڤپەیمانان ل ئیراقێ جەنەرال ھام و سەرۆکێ دەستەیا شێورمەندیا ھەڤپەیمانان ل کوردستانێ کۆلۆنەل براندستەتەر و شاندا پێ رە کر.
د ھەڤدیتنێ دە، فەرماندارێ ھێزا پشتەڤانیێ یەک، فەریق سیھاد بارزانی ھەڤکاریا ھەڤپەیمانان و بەردەوامیا پشتەڤانیا شێورمەندێن وان بۆ ھێزێن پێشمەرگە بلند نرخاند.
فەرماندارێ گشتی یێ شێورمەندێن لەشکەری یێن ھەڤپەیمانیا ناڤدەولەتی ل ئیراقێ جەنەرال ھام کێفخوەشیا خوەیا ل ھەمبەر پەیوەندیێن باش یێن د ناڤبەرا ھێزێن ھەڤپەیمان و ھێزێن پێشمەرگە دە نیشان دا. ھەروھا پشتەڤانیا ھێزێن ھەڤپەیمانیا ناڤدەولەتی بۆ فەرمانداریا ھێزێن پشتەڤانیێ یەک و پێشمەرگە دوپات کر.
سەرەدان و جڤینا فەرماندارێ گشتی یێ شێورمەندێن لەشکەری یێن ھەڤپەیمانیا ناڤدەولەتی ل ئیراقێ بۆ فەرماندەییا ھێزێن پشتەڤانیێ د دەمەکێ دەیە، دوھ 21 تەباخێ وەزیرێ پێشمەرگە شۆرەش ئیسماعیل د جڤینەکێ دە تەکەزی ل سەر ئاڤاکرنا ھێزەکە نشتمانی یا بھێز کر و گۆت: “ژ بۆ ئاڤاکرنا ھێزەکە نشتمانی ژ بۆ کوردستانێ ھەڤکار دبن.”
ھەروھا شۆرەش ئیسماعیل گۆت ژی: “ئەمێ پێڤاژۆیا چاکسازیێ بگەھینن ئەنجامێن گرنگ و پێویست د وەزارەتا پێشمەرگە دە.”
