“درۆنا ل سەییدسادق ئۆتۆمۆبیلا پەکەکێ ئارمانجکری، ژ بالەفرگەھا عەربەتێ رابوویە”

کەسایەتەکی نێزیک ل لاھور جەنگی راگەھاند، ئەو درۆنا کو ل سینۆرێ قەزا سەییدسادق یا سەر ب پارێزگەھا سلێمانیێ ئۆتۆمۆبیلەک ئارمانج کری و چەند کەسێن سەر ب پەکەکێ تێ دە کوشتی، ل بالەفرگەھا عەربەتێ رابوویە.

دوھ 23/8/2024 درۆنەکێ ل نێزیکی سەییدسادق ئۆتۆمۆبیلەک کر ئارمانجا ئێریشێ و ژ بەر وێ دو ژنێن کو ئەندامێن پەکەکێ یێن ب ناڤێن گولستان تارا و ھێرۆ بەھائەدین ژیانا خوە ژ دەست دان.

پشتی بوویەرێ یەنەکێ ب رێیا چاپەمەنیێ و کەسێن کرێگرتییێن خوە یێن کو خوە وەک رۆژنامەڤان دناسینن و چالاکڤانێن جودا جودا پێناسە دکن ڤە، بێ کو بەحسا ئەنجامدەرێن ئێریشێ بکن، بابەتێن جودا دەربارێ بوویەرێ دە بەلاڤ کرن. ڤێ یەکێ ژی گومان چێکر کو گەلۆ یەنەکە چما بەحسا ئەنجامدەرێن ئێریشێ ناکە؟

کەسایەتەکی نێزیک لاھور جەنگی یێ ب ناڤێ شێرکۆ تالەبانی د پێگەھا خوە یا تۆرا جڤاکی یا فەیسبۆکێ دە نڤیسەکە کورت بەلاڤ کر و راگەھاند: “نەفرەت ل خیانەتێ!” و گۆت: “ئەو درۆنا ئێریشا سەییدسادقێ پێ ھاتیە ئەنجامدان، ژ عەربەتێ رابوویە، نە ژ ترکیێ.”

ھەروەھا دیار کر، ئەندامێن پەکەکێ ژ ئالیێ یەنەکێ ڤە دبن ئارمانجا ئێریشێ و گۆت: “کرێگرتیێن دەباشان کار ل سەر دکن و ل راوەستەکان دە ئانگۆ ل خالێن کۆنترۆلێ ئەو ئەندام تێن دەستنیشان کرن.”