ل ئەنقەرەیێ کۆمەلەیەک تایبەت ب فێرکرنا زمان و چاندا کوردی ھەیە. ئارمانجا کۆمەلەیێ د سەری دە، پێشخستنا زمانێ کوردییە. ھندەک کوردێن ئەنقەرەیێ بەشداری کورسان دبن و فێری خوەندن و نڤیساندنا ب زاراڤەیێن کورمانجی و سۆرانی و رێزمانا کوردی دبن.
کۆمەلەیا زمان، چاند و ھونەرا کوردی ل ئەنقەرەیێ، بێ بەرانبەر وەلاتیێن کورد فێری خوەندن و نڤیساندنا زمانێ کوردی دکە و ھەولا پاراستنا زمان و کولتورا کوردی ددە.
مامۆستا ئامینا ئۆز ژ K24 رە گۆت: “ئەز ژی خوەندەکارەکا ڤێ کۆمەلەیێ بووم و ئەز فێری رێزمانا کوردی بووم. پشترە من پەروەردەھیا مامۆستەتیێ دیت و نھا ژی ئەز ل ڤر مامۆستاتیێ دکم.”
فێرخواز حەمید عەبدولحەمید دبێژە: “ئەم کوردی د ناڤا مالباتێ دە دزانی، لێ د خوەندن و نڤیساندنا من دە کێمانی ھەبوو، ب تایبەت کو دەما ئەم پەروەردەھیا کوردی یا ب فەرمی نەبینن. ئەم ھاتن د ڤێ دە خوە بپێش بخن.”
بەشەک ژ کوردێن کو مامۆستەیێن زمانێ ترکی بوون، نھا خانەنشین بوونە و دخوازن ڤێ جارێ د وارێ مامۆستەتیا ب کوردی دە خوە ب پێش بخن. ھەروھا ھندەک کوردێن ترکیەیێ حەزا وان ژ بۆی فێربوونا زاراڤەیێ سۆرانی ھەیە، ھەفتیێ دو جاران کورسێن فێربوونا زاراڤەیێ سۆرانی وەردگرن. مامۆستەیێ وان ژی ژ رۆژھلاتێ کوردستانێ یە.
مامۆستەیێ سۆرانی ھاشم رەشادەت ژ K24 رە گۆت: “ھن کەس ھەنە کو دخوازن ب دروستی فێری سۆرانی ببن، ئەز وان ل گۆری پرتووکێن وەزارەتا پەروەردەیا ھەرێما کوردستانێ فێر دکم.”
فێرخواز ئاک تووران دبێژە: “ئەز ھندەکی سۆرانی دزانم، ئەز دەمەکێ ل سلێمانیێ مابووم. گەلەک حەز دکم کو فێری سۆرانی ببم، من دەست پێ کریە و ئەزێ زمانێ خوە ب پێش ڤە ببم.”
ل گەل ھەموو ئاستەنگیێن ل پێشیا زمانێ کوردی ل باکورێ کوردستانێ و ترکیەیێ، دیسا ژی ھن کەسێن کو دخوازن رۆژێ چەند دەمژمێران ژ بۆ فێربوون و خزمەتا زمانێ کوردی خەرج بکن، ھەنە و ناھێلن زمانێ کوردی بێ ژبیرکرن.
